‘Vjedhja e Bankës’, Prokuroria do apelojë vendimin e Gjykatës për 10 të pandehurit

Prokuroria pritet të apelojë vendimin e Gjykatës për 10 ish-punonjësit e Bankës së Shqipërisë. Organi i Akuzës nuk është dakort me vendimin e Gjykatës së Shkallës së Parë në Tiranë, e cila dha vendimin për të 10 ish-punonjësit e BSH të akuzuar për shpërdorim detyre. Të përfshirë në skandalin e vjedhjes së 713 milion lekëve nga Thesari i Shtetit, 10- ish punonjësit u gjykuan në dosjen e parë të të akuzuarve dhe u dënuan nga gjykata me 11 vite burg në total. Burime të sigurta bëjnë me dije se Prokuroria do të apelojë vendimin e dhënë nga gjykata për ta, me pretendimin se nuk është në përputhje më dënimin që i korrespondon akuzës “shpërdorim detyre”. Prokuroria me një pretencë prej 23 faqesh kërkoi në dhjetor dënimin me 56 vjet burg për 10 të pandehurit. Për Dorian Çollakun ish- drejtorin e Departamentit të emisionit u kërkua 6 vite burg. Gjithashtu e njëjta masë dënimi u kërkua dhe për bashkëpunëtorët e tij: Bashkim Xhilagën, Myzejen Belbën, Lavdim Canin, dhe Liljana Tushën. Ndërkohë për 4 inventarizuesit Bahri Allushin, Gentjan Jahjën, Fatbardha Gurthin, dhe Mehdi Markun u kërkuan dënime me nga 5 vite heqje lirie. Por gjykata e Tiranës vendosi të dënojë me 11 vite burg në total ish-punonjësit e Bankës së Shqipërisë që me veprimet dhe mosveprimet e tyre u bënë shkak për vjedhjen e 713 milionë lekëve nga arka stok. Gjykata caktoi burg për të pandehurit duke iu ulur 1/3 e dënimit dhe pezulloi vendimin për njërin prej ish- punonjësve të Bankës Bashkim Xhilagën për shkaqe shëndetësore. Në këtë proçes, të gjithë të pandehurit përfituan uljen e 1/3 së dënimit për shkak se kanë pranuar të gjykohen me procedurën e gjykimit të shkurtuar. Kërkesa në Gjykatën e Ppelit nga Prokuroria lidhur me vendimin e gjykatës për 10 të akuzuarit e dosjes së parë të Bankës së Shqipërisë, pritet të bëhet pasi Gjykata të zbardhë vendimin për ta./tesheshi.com/