Deputeti i Vetëvendosje-s, Xhelal Sveçla, ka reaguar ndaj deklaratave të ministrit të Bujqësisë, Nenad Rikalo, i cili të premten përmendi edhe zyrtarë të VV-së, si ish-bashkëpunëtor, kurse me Albin Kurtin deklaroi se ka punuar në ish – organizatën KAN.
Deputeti Sveçla thotë se në KAN ka qenë kryetar i kuvendit dhe se as që bëhet fjalë se Rikalo të ketë qenë pjesë e asaj organizate.
Sveçla përmes Facebook ka shpërndarë edhe disa fotografi të dokumenteve që sipas tij dëshmojnë se deklaratat e banorëve të “Dardanisë” për ministrin e Bujqësisë, Nenad Rikallo, janë të vërteta.
Në këto dokumente sipas Sveçlës, në listën e oficerëve ushtarak rezervë të organizatës së tretë ‘Dardania’ në Prishtinë, “ku ndër 159 oficerë të mobilizuar gjatë luftës, i 129-i është babai i Nenad Rikallos, Radosllavi.
“Edhe të dhënat si adresa e numri i telefonit përputhen me vendbanimin e atëhershëm të tyre”, shkruan ai.
Deputeti Sveçla, akuzon qeverinë se në vend që të hulumtojë rreth të kalurës së Rikallos, mundohet që shpejt e shpejt e mbyllë rastin, “e krimineli të gënjejë e shpifë”.
“Ai është pjesë e qeverisë, tani edhe si kriminel sipas dëshmive. E jo vetëm ai, por e gjithë familja e tij”.
Sipas Sveçlës ka edhe dëshmi të tjera, që shteti ka përgjegjësi primare jo vetëm ta shkarkojë Nenad Rikallo, por edhe të burgoset e dënohet nga Gjykatat e vendit.
“Por e keqja vazhdon. Kuca e maca në PDK janë çuar peshë që të shfrytëzojnë shpifjet e Rikallos për të goditur Vetëvendosje-n dhe Albin Kurtin. Ju po tregoni se jo vetëm në qeveri por dhe në luftë speciale të nëntokës, jeni në sinkron të plotë me Serbinë”, shkruan ai në Facebook. /tesheshi.com/
