Sekretari i Shtetit i SHBA-së, Marco Rubio, ka shprehur besimin se disa vende arabe do t’i bashkohen të ashtuquajturave Marrëveshje të Abrahamit për të normalizuar marrëdhëniet me Izraelin këtë vit.
“Ne kemi një zyrë për Marrëveshjet e Abrahamit që po punon në mënyrë aktive për të identifikuar një numër vendesh që tashmë janë bashkuar dhe mendoj se do të kemi lajme të mira, sigurisht para fundit të këtij viti, nga një numër vendesh të tjera që janë gati të bashkohen me atë aleancë”, tha Rubio në fjalimin e tij para një komiteti të Kongresit, raporton AFP.
Megjithatë, Rubio nuk dha asnjë detaj rreth vendeve në fjalë.
Marrëveshjet e Abrahamit, të sponsorizuara nga Presidenti i SHBA-së Donald Trump në vitin 2020 gjatë mandatit të tij të parë në Shtëpinë e Bardhë, çuan në normalizimin e marrëdhënieve midis Izraelit dhe tre vendeve arabe: Emirateve të Bashkuara Arabe, Bahreinit dhe Marokut.
Por shumë vende arabe deri më tani kanë refuzuar t’i bashkohen këtij procesi, veçanërisht Arabia Saudite, si dhe fqinjët e Izraelit, Siria dhe Libani.
Riadi ende i pavendosur
Trump tha javën e kaluar se “shpreson sinqerisht” që Arabia Saudite të normalizojë marrëdhëniet me Izraelin gjatë një vizite zyrtare në Riad.
Për shkak të luftës së vazhdueshme në Gaza, Riadi ka përjashtuar çdo normalizim të marrëdhënieve me Izraelin pa njohur një shtet sovran dhe të qëndrueshëm palestinez.
Qeveria e kryeministrit izraelit Benjamin Netanyahu e kundërshton një projekt të tillë.
I pyetur në Kongres në lidhje me qëndrimin e Arabisë Saudite, Rubio tha se Arabia Saudite “ende ka dëshirën për ta bërë këtë”. /tesheshi.com/
