Tre ditë pas nënshkrimit të marrëveshjeve mes Prishtinës dhe Beogradit në dialogun e Brukselit, vjen edhe reagimi i kreut të Kuvendit, Kadri Veseli, i cili ka përshëndetur këtë hap duke shtuar se legjislativi duhet të ketë informacion të plotë zyrtar mbi procesin dhe përmbajtjen e tyre.
Në deklaratën nga zyra e kryeparlamentarit thuhet se Kuvendi i Kosovës, përmes procedurave demokratike, ka marrë vendime që mbështesin platformën e dialogut të Kosovës me Serbinë për normalizimin e raporteve në mes dy vendeve. Lidhur me marrëveshjet e fundit “presim që, në rrugë institucionale, t’i kemi informatat e plota zyrtare mbi procesin dhe përmbajtjet e këtyre marrëveshjeve”.
“Besojmë se Qeveria e Kosovës, e cila ka gjithë autoritetin legjitim për ta përfaqësuar Kosovën dhe për të marrë vendime për Kosovën në kuadër të dialogut me Serbinë, është në nivelin e duhur të pjekurisë politike dhe përgjegjësive të saj që i dalin nga Kushtetuta e Republikës së Kosovës. Është në interesin e vendit, që secila marrëveshje e arritur, në procesin e zbatimit, të hapë perspektivë të sigurt për zhvillimin e vendit, përparim në rrugën e integrimeve evropiane, të ndikojë në konsolidimin e shtetit të Kosovës, e assesi në bllokimin e tij”, ka deklaruar Veseli.
Ai po ashtu shpreh besimin se një gjë të tillë e kanë pasur parasysh edhe partnerët ndërkombëtarë që i kanë mbështetur dialogun dhe marrëveshjet. “Debati publik dhe politik që kanë nxitur këto marrëveshje, si dhe liria e interpretimit të tyre, është një e drejtë demokratike e patjetërsueshme e qytetarëve dhe partive politike, por akuzat, fyerjet dhe etiketimet demagogjike nuk i ndihmojnë qartësimit të publikut mbi përmbajtjet e marrëveshjeve, ashtu sikurse nuk i ndihmojnë perspektivës së vendit thirrjet në skenarë të përdorimit të dhunës”, thuhet në deklaratën e Veselit./tesheshi.com/
