Mensur Krasniqi
Vazhdoi sot seanca gjyqësore për rastin e Kumanovës. Edhe pse gjykata në seancën e fundit premtoi zgjidhje për pjesëmarrje të familjarëve në gjykim, ata edhe sot mbeten jashtë sallës së gjykimit. Gjykata kishte siguruar vetëm 10 vende të lira për familjarët nga gjithsej 29, mirëpo për shkak të respektit për njëri tjetrin dhe në shenjë proteste kundër gjykatës familjarët sërish vendosën të bojkojojnë. Ndërsa avokatët e gjobitur në seancën e fundit, poashtu për shkak të bojkotit gjysmë orësh të seancës gjyqësore meqë u solidarizuan me familjarët, ata sot kanë hyrë në gjykim me arsyetimin se nuk duan të zvarrisin procesin gjyqësor.
Ndryshe kjo ishte seanca e pestë me radhë, ku u dëgjuan shtatë dëshmitarë të propozuar nga prokuroria. Në mesin e tyre ishte edhe komandanti i stacionit policor të Pelincës dhe disa banorë të kësaj lagjeje.
Komandanti Zoran Stanojkovski i cili ishte epror i policit të akuzuar Arsim Bajrami, i cili akuzohet për logjistikë të grupit të armatosur, sqaroi se përse Bajrami nuk është paraqitur në punë në ditën e aksionit. Pra sipas tij, Bajrami ka kërkuar pushim mjekësor, por ka marrë urdhër të prerë nga eprorët që të paraqitet në stacionin në Kumanovë, ku menjëherë është arrestuar si i dyshuar për tradhëti dhe keqpërdorim të detyrës zyrtare.
Derisa dëshmitarët tjerë nuk kanë dhënë ndonjë deklaratë që mund të shërbej si dëshmi kundër të akuzuarve në Lagjen e Trimave. Sipas tyre askush nga banorët lokal që kanë mbetur në Lagjen e Trimave nuk ka parë se kush ka shtënë dhe prej ku.
Seanca e ardhshme gjyqësore është caktuar për 10 mars.
Kujojmë që më 9 dhe 10 Maj të vitit të kaluar në Kumanovë, në Lagjen e Trimave të banuar kryesisht me shqiptarë, një grup i armatosur u përplas me forcat policore maqedonase. Gjatë këtij incidenti humbën jetën 8 policë të njësive elitare të policisë, derisa 14 të tjerë u plagosën rëndë. Të vrarë mbetën edhe 10 persona të grupit të armatosur, dhe 29 të tjerët i janë dorëzuar policisë, me ç’rast akuzohen për terrorizëm dhe si pjesëmarrës në organizatë terroriste.
Seanca e pestë me radhë u zhvillua me dëgjimin e shtatë dëshmitarëve të propozuar nga Prokuroria, pesë që ngelën pa dëshmuar në seancën e fundit, dhe 4 të caktuar për dëshmi sot. Dëshmitarëtdeklaruan se nuk e kanë parë asnjë prej pjesëtarëve të grupit as para ditës së luftimit, e as në ditën e përleshjeve. Bejtulla Lutfiu dhe Afrim Tahiri kishin deklarata identike sa i përket kohës kur kanë nisur të shtënat, dhe evakuimit nga policia duke deklaruar se në lagje kishte qenë gjithçka e qetë dhe jo e dyshimtë deri në momentin e mëngjesit të 9 majit. Ndërkohë eprori i policit të akuzuar Arsim Bajrami, Zoran Stanojkovsi, konfirmoi se Bajrami ditën e luftimeve kishte kërkuar ditë të lirë për shkak se kishte vajzën e sëmurë por megjithatë inspektori kryesor e kishte kërkuar që të paraqitet në mbledhjen e policisë në stacionin e Kumanovës. Në atë moment Bajrami ishte arrestuar ndërsa eprori i tij nuk kishte dëgjuar asgjë për të deri në momentin që policia e ka thirrur atë që të mbikëqyrë marrjen e tij në pyetje. Stanojkovski pohoi se Arsim Bajrami kishte pranuar se ka njohur disa prej pjesëtarëve të grupit në momentin që i kishte parë në fotografi. Arsim Bajrami shfrytëzoi të drejtën e tij për të bërë pyetje dëshmitarit Stanojkovski se përse nuk ka qenë në dijeni me asgjë që ka ndodhur me të edhe pse me rregulloren e policisë, eprorët duhet të dijnë gjithçka rreth policëve të tyre, sidomos kur ndaj tyre zhvillohet ndonjë proces. E pakta që mund të kishte bërë Stanojkovski sipas Bajramit, ka qenë që ta shoqërojë gjatë arrestimit të tij, apo bastisjes së shtëpisë. Vazhduan edhe sot denoncimet për dhunën policore. Sipas dëshmitarëve, policia vazhdimisht ka ofenduar dhe ka goditur pjesëtarët e familjeve të tyre. Seanca e ardhshme gjyqësore u caktuar për pasnesër. /tesheshi.com/
