Një bashkëpunëtor i ngushtë i udhëheqësit të vrarë të grupit të armatosur të ISIL-it, Abu Bakr al-Bagdadi, është arrestuar në Stamboll, tha policia turke të dielën.
Deklarata specifikoi se shtetasi afgan u identifikua vetëm me emrin sekret Basim, i arrestuar të mërkurën në rrethin Atasehir, në anën aziatike të qytetit, raporton AP.
Raportet e medias mbi veprimin e shërbimit të inteligjencës turke deklarojnë se i dyshuari ishte i përfshirë në fshehjen e Bagdadi në provincën siriane të Idlib pas rënies së ISIL në 2019.
Bagdadi u vra në një bastisje në një strehë në Siri të kryer nga forcat speciale amerikane në tetor 2019.
Media turke publikoi një foto të një njeriu tullac me mjekër pas arrestimit të tij dhe një foto të gjoja të njëjtit person nga një periudhë e hershme, me flokë të gjatë, një mjekër të trashë dhe me rroba maskimi duke tundur një shpatë të lakuar.
Agjencia e lajmeve Demiroren njoftoi se Basim dyshohet për organizimin e trajnimit për ISIL në Siri dhe Irak, si dhe për të qenë në bordin e vendimmarrjes së grupit.
Agjencia shton se ai hyri në Turqi me një pasaportë të rreme dhe një letërnjoftim të rremë. /tesheshi.com/
