Fushata ka marrë hov qysh në fillim të hapjes së saj. Gjasat që ndonjë parti të shkëputet mbi 50% kësaj radhe do të jenë të vogla. Arsyeja është se situatat dhe temat që ishin të kaluara e të tejkaluara nuk janë aq vendimtare, koha po ecën shpejt dhe gjeopolitika do të ketë ndikimin e vet. Tani edhe VV-ja ka një periudhë qeverisjeje të Kosovës. A ka mangësi, gabime e dobësi menaxhuese? Sa të duash. A ka gjëra të mira? Po, sidomos pastrimi i terrenit në pjesën veriore të vendit dhe një tkurrje e korrupsionit.
Momentalisht, fushatës po i prin një befasi në dukje të parë: partia që së fundi doli në skenën politike të Kosovës, Koalicioni për Familje. Të tjerat janë vetëm refren i masave klienteliste e populiste. LDK-ja, me frymën e politikës rugoviane që tashmë është demode dhe e pabesueshme, nuk po arrin të zhvillojë një frymë politike pragmatike në rrethana të reja. Ndërsa PDK-ja dhe AAK-ja po sillen pak si të fjetura dhe nën hijen e politikave dhe aferave të kaluara qeveritare. Gjithashtu, nuk është se kanë një besueshmëri të madhe tek votuesit. Pra, megjithë premtimet, shpeshherë megallomane e që duken si ëndrra dhe dëshira, partitë që ishin në pushtet më shumë se një herë kanë pasur kohën e botës për realizimin e projekteve të proklamuara.
Tani VV-ja do të penalizohet, sidomos për dështimet në fushën e arsimit, shëndetësisë, gjyqësorit dhe ekonomisë, si dhe për nënshtrimin dhe mbështetjen ndaj disa OJQ-ve me antivlera familjare. Por, ajo prapë do të ruajë primatin në politikën vendore me disa vështirësi.
Partitë opozitare, me përjashtim të Koalicionit për Familje, edhe pse proklamojnë programe e projekte mjaft interesante në dukje, megjithatë shumë pak njerëz do t’u besojnë, përveç anëtarësive të tyre.
Ndaj, risia e zgjedhjeve të pritshme, është pikërisht Kolalicioni për Familje, e cila ka një kauzë mjaft imponuese, të cilën e udhëheq një figurë me sens të fortë lidershipi, Eman Rrahmani. Është pikërisht ky dhe ata krah tij, burra e gra, figura të pastra dhe me profil të lartë shoqëror, freskia dhe alternativa joshëse e zgjedhjeve të pritshme në Kosovë. /tesheshi.com/
