Administrata e Presidentit Donald Trump ka hedhur poshtë një plan të shumëpritur për rindërtimin e Gazës, i cili u miratua nga udhëheqësit arabë në një samit në Kajro dje.
Reagimi i Shtëpisë së Bardhë ndaj propozimit të Ligës Arabe për rindërtimin e Gazës nuk është befasi duke pasur parasysh se ajo ishte shumë kundër asaj që Trump ka propozuar për zhvendosjen e më shumë se dy milionë palestinezëve nga Gaza.
Trump e ka bërë shumë të qartë vizionin e tij për enklavën, duke thënë se dëshiron ta zhvillojë atë si një pronë bregdetare, pa palestinezët, të cilët ai tha se mund të shkojnë në vendet fqinje arabe, për të jetuar atje.
Zëdhënësi i Këshillit të Sigurisë Kombëtare, Brian Hughes, konfirmoi në një deklaratë për mediat refuzimin e planit të lartpërmendur nga liderët arabë.
“Propozimi aktual nuk adreson realitetin se Gaza aktualisht është e pabanueshme dhe se banorët nuk mund të jetojnë njerëzisht në një territor të mbuluar me mbeturina dhe municione të pashpërthyera. Presidenti Trump i qëndron vizionit të tij për rindërtimin e Gazës së çliruar nga Hamasi. Ne mezi presim diskutime të mëtejshme për të sjellë paqe dhe prosperitet në rajon”, tha cinikisht ai.
Izraeli gjithashtu hodhi poshtë planin e liderëve arabë për të rindërtuar Gazën. Ata ekskluzivisht pranojnë dëbimin e plotë të palestinezëve nga Gaza.
Çfarë thuhet në planin egjiptian për rindërtimin e Gazës?
– Faza e parë do të zgjaste pothuajse gjashtë muaj, ndërsa dy fazat e ardhshme do të zhvillohen së bashku për katër deri në pesë vjet.
– Një periudhë kalimtare gjashtëmujore do të kërkojë një komitet teknokratësh palestinezë – që veprojnë nën drejtimin e Autoritetit Palestinez – për të pastruar rrënojat nga rruga Salah al-Din, e cila është autostrada kryesore që lidh veriun dhe jugun në Rripin e Gazës.
– Pasi të pastrohen rrugët, do të ndërtohen 200,000 banesa të përkohshme për të strehuar 1.2 milionë njerëz dhe gati 60,000 ndërtesa të dëmtuara do të rindërtohen.
– Sipas planit, rindërtimi afatgjatë kërkon katër deri në pesë vjet shtesë pas përfundimit të masave të përkohshme. Gjatë asaj periudhe, plani synon të ndërtojë të paktën 400,000 shtëpi të përhershme, si dhe të rindërtojë portin dhe aeroportin ndërkombëtar në Gaza.
– Nevojat bazë si uji, sistemet e mbeturinave, shërbimet e telekomunikacionit dhe energjia elektrike do të rikthehen gradualisht.
– Përveç kësaj, do të mbahen konferenca për donatorët ndërkombëtarë për të siguruar fondet e nevojshme për rindërtimin dhe zhvillimin afatgjatë të Rripit. /tesheshi.com/
