Me aksiomën “ju llafe, ne punë”, partia Socialiste organizon nesër një tubim të madh në orën 18.00 në sheshin “Skënderbej”, i rindërtuar. Dikur ky shesh ka qenë simbol i protestave anti-komunizëm dhe i tubimeve të PD-së së Berishës
Sheshi kryesor i Tiranës “Skënderbej”, është gati për t’iu prerë shiriti i inagurimit. Socialistët do të mbushin nesër në orën 18.00 këtë shesh në një tubim të madh që vjen në një moment kur opozita po proteston pak metra më tutje në bulevard. Burime nga PS-ja bënë të ditur se organizimi për tubimin e nesërm ka përfshirë të gjithë strukturat partiake në të gjitha rrethet. Synimi është tek demonstrimi i forcës së numrave kundrejt Opozitës e cila organizoi protestën e saj të madhe më 18 shkurt, protestë që vijoi me një numër të vogël njerëzish që qëndrojnë çdo ditë në çadrën e ngritur para Kryeministrisë.
Pse në sheshin Skënderbej?!
Që nga viti ’91 kur në këtë shesh u shemb shtatorja e diktatorit Enver Hoxha, ky shesh është parë si një simbol i protestave anti-qeveritare. Në këtë shesh, partia Demokratike e drejtuar nga Sali Berisha ka bërë tubimet dhe protestat e saj gjatë viteve të tranzicionit. Në vitin 2005 kur PD rierdhi në pushtet ishte mbushja e këtij sheshi plot e përplot me njerëz që krijoi idenë e fitores tre ditë para zgjedhjeve. Nuk ishte as e rastësishme dita kur Rama vendosi të vinte gurin e parë në shesh duke zgjedhur një gur nga Tropoja, vendlindja e Berishës. Në mënyrë simbolike e gjithë hapësira është shtruar me gurë të sjellë nga krahina të ndryshme të vendit, edhe nga Kosova.
Gjithashtu ky shesh ka qënë një mollë sherri mes dy palëve. Kur Edi Rama si kryetar bashkie tentoi ta rindërtonte me konceptin e krijimit të një parkingu nëntokësor PD-ja e bllokoi deri në ardhjen e Lulzim Bashës kryetar bashkie, i cili i rrafshoi punimet dhe e mbolli me pemë. Përurimi i tij në një moment si ky është një përgjigje direkte për opozitën dhe një akt i pastër elektoral në prag të zgjedhjeve të reja parlamentare.
Rindërtimi i tij i faturuar si një punë e kryer e bashkisë së re nën drejtimin e Erjon Veliajt është një mburrje për Rilindjen.
Pak histori
Siç duket nga një foto e postuar sot nga Rama, ku bëhet krahasimi mes vitit 2013 dhe sot të këtij sheshi, shihet qartë se Skënderbej ka marrë një pamje të re. Kjo pamje në fakt i ngjan shumë projektit të hershëm të qeverisë së Ahmet Zogut; i hapur vetëm për këmbësorët, me shatërvanë në mes dhe një hapësirë e madhe boshe e rrethuar me ndërtesat e vjetra, bashkia, pallati i kulturës dhe muzeu kombëtar. Në një shekull jetë sheshi ka parë shumë ndryshime, që nga ndërhyrja e italianëve gjatë pushtimit fashist, tek konceptimi komunist e deri tek ndërhyrjet në kohën e Demokracisë.
Ai është nisur nga arkitektë italianë, të thirrur nga mbreti Zog dhe po përfundon sërish si një ide e italianëve me arkitektin Stefano Boeri, i kontraktuar nga Rama. /tesheshi.com/
