Nga Ermir Hoxha
Kryeministri grek, Alexis Tsipras ka bërë një diversion të qartë politik ndaj Shqipërisë, duke e cilësuar Ilir Metën si të moderuar dhe Edi Ramën si një ekstremist”.
Kreu i Athinës, i cili është në armiqësi të vjetër me Angela Merkelin dhe që u acarua me kryeministrin shqiptar kur ky i fundit nuk u pajtua me politikat e revolucionarit majtist, e si përfundim anuloi vizitën në Tiranë, ka anonçuar një provokacion politik karshi Tiranës në prezencë të aleatit më të ngushtë të Edi Ramës, përkatësisht kreut të Kuvendit, Ilir Meta.
Gjatë një takimi që ka zhvilluar në Pallatin Maximos në Athinë, Alexis Tsipras i ka hedhur më shumë “benzinë zjarrit”që kanë ndezur Presidenti grek dhe kreu i Parlamentit kur e kanë përdorur delegacionin që kryeson Meta si një “portë” për të bërë golin që pësuan nga komisioneri i BE-së për Zgjerimin Johannes Hahn, i cili kërkoi zgjidhjen e çështjes çame.
Tsipras, edhe pse publikisht nuk ka përmendur përlasjet mes dy vendeve, ka vlerësuar zëshëm rolin e Metës kundër zërave nacionalistë.
“Duhet të mbrojmë perspektivën e fqinjësisë së mirë. Duhet ta mbrojmë këtë perspektivë nga zërat ekstremistë, nacionalistë. Në këtë kuadër, dua t’ju falanderoj juve sepse keni qenë gjithnjë përballë këtyre zërave nacionalistë”, tha Tsipras, duke e vënë Metën pikërisht përballë Ramës dhe Shpëtim Idrizit.
Meta nga ana e tij ka mbajtur të njëjtën linjë të deklaratave të bëra gjatë gjithë vizitës në Greqi.
“Unë besoj që ne, me urtësi dhe vullnet pozitiv, jo vetëm do t’i japim një hop të ri marrëdhënieve të gjithanshme shqiptaro-greke, sepse kjo është një kërkesë e qytetarëve tanë. T’i trajtojmë në mënyrë konstruktive dhe sipas përkatësisë europiane që na takon të gjitha çështjet e mbartura nga e kaluara”, tha Meta.
Veç takimit zyrtar, mes tyre është zhvilluar dhe një takim kokë më kokë, madje dhe pa praninë e përkthyesit.
Presidenti i Greqisë, Pavlopulos, me një protokoll të paparë deri më sot, ka përmendur me arrogancë çështjen e varrezave të ushtarëve grekë në Shqipëri.
Zakonisht në Presidencë bëhen vetëm fotot dhe filmimet kur personalitetet flasin fjalët e mirësearsdhjes, por këtë herë televizionet janë lënë për të dëgjuar ligjëratën e kreut të shtetit grek për një çështje që tashmë ka ndodhur. Në Shqipëri ekzistojnë dy varreza të ushtarëve grekë: një në Vularat dhe një në Këlcyrë.
Por Athina ka kërkuar pesë të tilla.
Vizita e Metës në Athinë ka tronditur situatën poltike në Tiranë dhe ka hapur një front tjetër politik.
Enkel Demi, në një editorial të tij theksonte se Athina ka sponsorizuar krijimin e një poli të tretë politik për të rrëzuar Edi Ramën, ku nënkuptonte Ben Blushin. /tesheshi.com/
