Zv/kryeprokurori bullgar dha detaje të tjera në lidhje me rastin tragjik të jetëhumbjes së dhjetra shqiptarëve të Maqedonisë, pas djegies së një autobusi ku ata ishin pasagjërë, ndodhur kjo në një autostradë të Bullgarisë, në itinerarin Stamboll – Shkup.
Ai tha se janë 44 jetëhumbje dhe jo 45 të raportuara deri më tani. Ai ka sqaruar se 8 persona kanë shpëtuar, por që në spital kanë shkuar 7 ndërsa një nuk gjendet. Dyshohet se ky “i zhdukur”. kur ka ndodhur ngjarja ka zbritur nga autobusi dhe ka hipur në një mjet tjetër.
Ndërsa në lidhje me shkakun e aksidentit, Sarafov tha se mendohet të jetë shkaktuar nga gabim njerëzor.
“Për momentin pista më e besueshme është ajo e faktorit njeri, për të cilin po shqyrtohen kushtet e seksionit ku ka ndodhur aksidenti, si sinjalistika dhe ndriçimi rrugor.
Bordura të cilin e ka goditur shoferi i autobusit është jo vetëm e panevojshme por edhe e rrezikshme. Në vendngjarje nuk pati asnjë shpërthim, por zhurma e fortë që u dëgjua ishte ajo e autobusit që u përplas bordurë, ndoshta kjo është arsyeja pse autobusi mori flakë”, ka deklaruar Sarafov.
Ndërsa në lidhje me aludimet se autobusi po transportonte karburant kontrabandë, zv. prokurori e hodhi poshtë duke thënë:
“Ka pasur informacione se në autobus po transportoheshin derivate karburanti, si benzinë dhe dizel, dhe se ato mund të kenë qenë shkaqet e shpërthimit të zjarrit. Kjo pistë është hetuar, por kategorikisht e hedhim poshtë si të pabazuar. Tre bidonë u gjetën në vend, që përmbanin vetëm mbetje vaji, pra nuk ishin të mbushur dhe as të djegur. Kjo nënkupton se zjarri nuk është shkaktuar nga karburanti”. /tesheshi.com/
