Në kulmin e debateve mbi cështjen “Balili”, “Shuke”, e së fundi dhe atë mbi përgjimin e mundshëm të politikanëve dhe zyrtarëve të lartë të shtetit, Rudina Xhunga, gazetare dhe moderatore televizive, i ka kushtuar një shkrim tragjedisë së paradisaditëve në Golem të Kavajës, ku si pasojë e një aksidenti, një grua në timon humbi dy fëmijët e saj. Me anë të shkrimit, Xhunga i ka kërkuar dorëheqjen ministrit të Transporteve, Edmond Haxhinasto, duke e konsideruar pikërisht atë si kokën e përgjegjësisë institucionale për atë hapësirë në trafikndarëse që çoi dhe në vdekjen e dy fëmijëve, vëlla e motër. Shkruan Xhunga:
“Ministri përgjegjës i transporteve, i rrugëve, autostradave, trafikndarëseve, është Haxhinasto. Ai foli ditën e tragjedisë, ngushëlloi familjen dhe tha se hetimet do të gjejnë shkaktarin.
Hetimet u bënë. Shkaktari u gjet. Vdekja ndodhi sepse trafikndarësja ishte çarë për të lehtësuar punën e një karburanti, në pronësi të babait të shefit të kabinetit të vetë ministrit Haxhinasto.
Tre vetë nga ministria e Edmond Haxhinastos, janë në burg.
Tani, ministër Haxhinasto, jep dorëheqjen! Je ti përgjegjësi moral i vdekjes së dy fëmijëve.
Ti je nga ministrat më jetëgjatë në gjithë qeveritë shqiptare, do bësh si do bësh, edhe pa një vit më shumë në qeverisje, por nuk do ia bësh dot po vazhdove, sepse askush nuk ka më dyshime, askush nuk ka më dilema; fajtori je ti.
Nuk ke ushtruar kontroll në një rast të pastër përfitimi nga pushteti. Me mungesën e informacionit, në rastin më të mirë dhe me mbylljen e syve, para një rasti përdorjeje të pushtetit tuaj, në rastin më të keq, fajtori je ti.
Merr përgjegjësi për vdekjen e dy fëmijëve! Përgjegjësi morale. Bëje se je baba. Kush është prind e di ç’do të thotë sa e vështirë është të rrisësh fëmijë, por kur i rrit, i bën vogëlushë, 5 dhe 3 vjeç dhe t’i ndan në mes, një llamarinë e mallkuar, çfarë të bësh? Kur je i fortë, kur je i pasur, kur je ministër, e gjen lehtë, madje edhe e tejkalon të drejtën, po kur je i thjeshtë, i zakonshëm, pa zë, pa fuqi, çfarë të bësh? Do bësh si Sokoli, që rri e mbjell lule në oborr dhe përsërit me zë të shuar; e ç’rëndësi ka, i kujt është faji, tani që askush nuk m’i sjell dot fëmijët.
E dini pse e thotë ai këtë? Se me siguri mendon, që fajin e ka e shoqja, Silvana, që të gjithë e ruajnë, mos vret veten, se po e ha faji.
Silvana, nuk ishte faji yt. Hetimet e thanë qartë që nëse do të kishe rrëshqitur pak më tej, të katërt do mbesnit gjallë. Ju vrau trafikndarësja. Sepse korrupsioni vret. Përfitimi nga pushteti vret.
Mallkuar qoftë, kush bën sikur nuk kupton që Dritanin dhe Aliçen, tre dhe pesë vjeç, i vrau Ministria shqiptare e Transporteve!
Ndaj, Haxhinasto, na bëj të ndihemi njerëz, jep dorëheqjen!”
/tesheshi.com/
