Vazhdon rezistenca brenda Partisë Demokratike për takimin e pritshëm mes kryeministrit Edi Rama dhe kreut të opozitës, Lulzim Basha, në lidhje me reformën në drejtësi.
Ish-kryetarja e Kuvendit, Jozefina Topalli, e cila njihet si një nga kritizeret më të forta ndaj politikës së Bashës, deklaroi se një takim i tillë nuk do të sillte ndonjë gjë në politikë.
Sipas saj zgjidhja duhet të kërkohet brenda Parlamentit me një vullnet të qartë politik.
“Nuk kam parë në vende të tjera që një çështje e tillë të shtrohet në politikë apo media, që do të takohen dy kryetarët e partive të kryesore apo jo?
“Në një jetë normale parlamentare ato mund të takohen, por çështjet zgjidhen në parlament, jo jashtë parlamentit. Një vend që nuk ka asgjë nga normalja, duke filluar nga qeverisja, listat e deputetëve në parlament, nga jeta ekonomike me vështirësi të shumëfishuara, sigurisht që kjo përbën lajm por nuk është një çështje të cilës nuk mund ti përgjigjem unë.As nuk mendoj se çështjet zgjidhen për shkak se po takohen dy persona. Çështjet zgjidhen kur ka një vullnet të fortë politik për ti shërbyer vendit dhe interesit publik”, deklaroi Topalli.
Dialogu politik është vështirësuar shumë nga vendimi i Byosë së Parlamentit për të përjashtuar ish-kryeministrin Sali Berisha për 10 ditë nga Kuvendi. /tesheshi.com/
