Nga Miradie Hasani
Pritet këtë javë aprovimi nga qeveria i krijimit të ansamblit shtetëror shqiptar të këngëve dhe valleve. Sekretari shtetëror në Ministrinë e Kulturës, Valmir Aziri, thotë se vendimi është marrë, por po priten konsultimet e fundit për krijimin e ligjit në mënyrë që ky ansambël të funksionojë në mënyrë të përkryer.
“Buxheti i parë vjetor duke marrë parasysh rrogat, investimet në kostumografitë, instrumente dhe në pjesët praktike janë përafërsisht 800 mijë euro. Mirëpo këto janë buxhete të cilët variojnë në bazë të nevojave të cilët do të paraqiten për krijimin e këtij institucioni”, tha Aziri.
Por ja që dhe këtu ka lindur një kundërshti, si për shumë gjëra mes shqiptarësh.
Muzikologu Emin Salihi nuk pajtohet që ansambli të jetë në Tetovë dhe kërkon të jetë në Shkup, pasi sipas tij, që çdo ansambël shtetëror ka selinë në kryeqytet. Ai thotë se ky ansambël nuk duhet të politizohet, por artistët vetë të zgjedhin komisionet që do t’i menaxhonin.
“Të gjithë ansamblet shtetërore gjenden nëpër kryeqytete si shota në prishtinë, ansambli shtetëror në tiranë dhe taneci në shkup. edhe tek ne duhet që ansambli shtetëror themelet t’i ketë në shkup. mirëpo duhet të ketë debat dhe tryeza të përbashkëta të shoqërive kulturore, artistët, valltarët, muzicinetët të përzgjedhin nëpërmjet komisioneve jo nëpërmjet klanit”, tha Salihi.
Por Sekretari shtetëror Valmir Aziri thotë se modeli për këtë ansambël është marrë nga ansambli maqedonas “Tanec”, dhe i njëjti do të reflektojë vlerat shqiptare në të gjitha trevat ku jetojnë në Maqedoni. Ai thotë se ansambli do të jetë në Tetovë për shkaqe praktike se aty gjendet Pallati i Kulturës.
Ndërsa deputeti i Bashkimit Demokratik për Integrim në pushtet, Artan Grubi, është bërë pjesë e debatit publik në lidhje me selinë e ansamblit shtetëror të këngës dhe valles shqipe në Maqedoni. Ai në profilin e tij në në Facebook ka ka shuar dilemat rreth selisë së Ansamblit duke e e njoftuar opinionin që ky institucion do të vendoset në Shkup
“Mirëpres debatin shoqëror rreth nismës sonë së kahmotshme për themelim të Ansamblit shtetëror të këngëve dhe valleve shqipe në Maqedoni. Ky ansambël do të jetë përfaqësues i kulturës tonë autoktone, me të gjitha nishanet dhe ashtu si duhet dhe ashtu si presin profesionistët e lëmisë”, u shpreh Grubi. /tesheshi.com/
