Ndërsa skadon afati për shembjen e murit në Mitrovicë, vendosur nga një rezolutë e miratuar në Kuvendin e Kosovës, presidenti Hashim Thaçi e konsideron këtë çështje, punë të brendshme të vendit që nuk do të shtrohet për diskutim në takimin e Brukselit, ditën e mërkurë.
Një ditë para takimit, Thaçi theksoi në një deklaratë për mediat se muri i ngritur nga serbët në veri të vendit nuk do të diskutohet me autoritetet e Beogradit.
Megjithatë, presidenti Thaçi nuk ka sqaruar se çfarë do të ndodhë konkretisht me këtë mur.
Ndërkohë, bëhet e ditur se kryetari i komunës së Mitrovicës së Veriut, Goran Rakiç ka deklaruar se nuk ka asnjë marrëveshje me qeverinë e Kosovës për ta shembur murin. Shtypi i ditës në Prishtinë citon burime institucionale, sipas të cilave, muri do të shembej nga vetë serbët me arsyetimin se rrezikonte banorët e veriut. /tesheshi.com/
