Presidenti Hashim Thaçi në një intervistë për televizionin publik zviceran (SRF), ka folur për transformimin e FSK-së, ku ka thënë se Kosova është një shtet i pavarur dhe çdo shtet sovran ka një ushtri.
Sipas tij, transformimi i FSK-së do të forcojë shtetësinë e Kosovës, meqë nuk ka shtet të fortë pa ushtri, duke thënë se tani është koha e duhur që ky proces të përmbyllet.
“Ne kemi pritur tepër shumë dhe ka ardhur koha tani dhe kjo do të ndodhë”, ka paralajmëruar presidenti për SRF, por nuk ka dhënë një datë apo nëse ushtria do themelohet sivjet.
“Qëllimi ynë është që të bëhemi pjesë e NATO-s. Nëse ne nuk e kemi një ushtri, nuk mund të lidhim partneritet për paqe me NATO-n. Ne do të punojmë që ushtria e Kosovës të jetë një ushtri multietnike”, ka deklaruar Thaçi.
Kujtojmë se presidenti javë më parë u tërhoq nga iniciativa e tij që ushtria të bëhet përmes ndryshimeve kushtetuese pas presionit të vazhdueshëm ndërkombëtar, të cilët duan që një gjë e tillë të ndodhë përmes votimit në Kuvend, ku do votonin edhe deputetët e minoritetit serb./tesheshi.com/
