Presidenti i ri i Kosovës, Hashim Thaçi në fjalimin inagurues pas zgjedhjeve ka falënderuar LDK-në dhe Listën Serbe si pjesë të koalicionit që e zgjodhi në këtë post.
“Falënderoj deputetët për besimin, ky është një besim për një detyrë dhe përgjegjësi më tepër për t’i shërbyer vendit dhe qytetarëve të Kosovës.
I falënderoj të nderuar ambasadorë për qëndrimin tuaj tërë ditor këtu së bashku me neve. Dëshiroj të falënderoj të gjithë deputetët dhe të gjithë njerëzit e skenës politike kosovare. Falënderoj PDK-në, LDK-në, Listën Serbe, 6 plusin dhe deputetët e pavarur.
Ju siguroj se besimi juaj do të jetë një shpresë e re për Republikën e Kosovës do të punoj gjithnjë në shërbim të vendit dhe të qytetarëve, duke respektuar kushtetutën dhe institucionet demokratike, duke punuar për rend dhe ligj, për të ndërtuar Kosovën e re dhe për të punuar për anëtarësimin e Kosovës në NATO dhe BE dhe për partneritet të fuqishëm me SHBA-në. Të jeni të sigurt se do të punoj edhe më fuqishëm për dialogun institucional.
Sot në këtë moment madhështor dhe të veçantë edhe për mua dëshiroj të përkujtoj herozimin e Adem Jasharit dhe të gjithë dëshmorëve dhe presidentin historik Ibrahim Rugova dhe të gjithë njerëzit që kontribuan për shtetin e Kosovës”, ka theksuar Thaçi në fjalimin inagurues si kryetar shteti.
/tesheshi.com/
