Presidenti i SHBA Donald Trump, i cili përballet me kritika për njoftimin për tërheqjen e mijëra trupave amerikane nga Gjermania, u tha të diplomuarve të Akademisë Ushtarake West Point se puna e tyre do të ishte “mbrojtja e interesave jetike të Amerikës” dhe jo pjesëmarrja në “luftëra të pafundme” në tokat e largëta, raporton Reuters.
Shpallja e planeve të Trumpit për të transferuar 9.500 trupa nga Gjermania, një nga aleatët kryesorë të SHBA-së, në Poloni dhe gjetkë, ka zemëruar zyrtarët gjermanë dhe ka ngritur shqetësime në Kongresin Amerikan se vendi po tërhiqet nga skena botërore.
Duke iu drejtuar kadetëve me rastin e përfundimit të tyre të suksesshëm të shkollimit në West Point, Trump tha se detyra e një ushtari amerikan nuk është të ndërtojë dhe rindërtojë shtetet e huaja, por “të mbrojë, dhe ta bëjë këtë me forcë, kombin amerikan nga armiqtë e jashtëm”.
“Ne po i japim fund një epoke të luftërave të pafund”, tha Trump. “Nuk është detyra e forcave amerikane për të zgjidhur konfliktet e vjetra në tokat e largëta për të cilat shumë as nuk kanë dëgjuar.”
Trump tërhoqi trupat amerikane nga Siria gjatë presidencës së tij dhe, duke njoftuar një ulje të angazhimit amerikan, si dhe bëri presion ndaj aleatëve për të paguar më shumë për mbrojtjen e tyre.
Në kritika relativisht të rralla nga Partia Republikane, 22 anëtarë të Komitetit të Forcave të Armatosura të Dhomës së Përfaqësuesve të Kongresit thanë që ulja e numrit të ushtarëve amerikanë në Gjermani “do të dëmtonte sigurinë kombëtare dhe do të inkurajonte agresionin rus”.
Në fjalimin e tij drejtuar më shumë se 1 mijë kadetëve, Trump vetëm në mënyrë indirekte adresoi çështjen aktuale të padrejtësisë racore në Shtetet e Bashkuara, duke thënë se kadetët janë një shembull i diversitetit amerikan.
“Ju keni ardhur nga fermat dhe nga qytetet, shtetet e mëdha dhe të vogla, nga çdo anë, fe, ngjyrë dhe besim. Por kur hyni në këtë zonë u bëtë pjesë e një skuadre dhe e një familjeje që i shërben me krenari kombit të bashkuar amerikan”, tha ai. /tesheshi.com/
