Paaftësia për të luajtur në nivele të larta e ka shtrënguar ish-numrin një të botës, një prej tenisteve më simpatike, ta lërë tenisin.
Ana Ivanovic, tanimë 29-vjeçare, i ka thënë stop aktivitetit profesionist në fushën e tenisit.
“Pas 13 vitesh së luajturi tenisin profesionalisht, kam marrë vendimin tejet të vështirë për t’u tërhequr nga tenisi konkurrues. Ka qenë një vendim i vështirë…,” lajmëroi vetë tenistja.
Ivanovic ka kaluar një vit të vështirë. Tenistja serbe zbriti deri në vend të 63-të në renditjen botërore, pasi nuk luante që prej gushtit të 2016-s për arsye dëmtimi. Vetëm 15 takime fitoi ajo gjatë këtij viti; fitorja e fundit qe në qershor.
Viti 2008 do të shënonte kulmin e karrierës së saj, kur dhe do të bëhej numri një i botës. Ana Ivanovic e kryesoi për dymbëdhjetë javë renditjen botërore të tenisteve. 15 qe numri i titujve vetjakë të fituar gjatë karrierës së saj.
Një sukses tjetër qe po në 2008-n fitorja e turneut French Open, në gjysmëfinalen e të cilit arriti dhe në 2015-n. Ajo po ashtu qe finaliste në të njëjtin turne në vitin 2007, si dhe në turneun e Wimbledon-it. Një vit më tutje do të luante dhe në finalen e Australian Open-it. /tesheshi.com/
