Vërtetë u sheshuan problemet mes Ramës dhe Metës në takimin e së shtunës?! Duket se jo, edhe pse qarqe të afërta me kreun e LSI-së flasin për ndryshime në kabinet dhe lëvizje që janë folur prej kohësh si mundësi, siç është Ministria e Financave që LSI-së i është “rritur oreksi” që ta marrë.
Dhe si kandidat imundshëm do të jetë pikërisht deputeti homolog i Shkëlqim Canit në Bulqizë, Përparim Spahiu.
Por palët po luajnë duke mbajtur nervat ngrehur në një kohë që LSI kërkon ndryshimet të shpejta për të larguar vëmendjen nga rrjedha e debatit politik që mori çështja e CEZ-it.
Mirëpo sa përfundoi diskutimi në publik i kësaj afere, ku LSI-ja çdo ditë ka lëshuar akuza se “është prerë në besë” nga aleatja e saj, në treg ka dalë një tjetër rast i rëndë që mund të kthehet në “bombë” më e madhe se çështja CEZ.
Bankers Petroleum, gjigandi kanadez që ka marrë me koncension shfrytëzimin e pasurive të naftës në zonën e Marinzës, ka kërkuar kredi duke përdorur si kolateral pikërisht pronat e shtetit shqiptar siç janë fushat dhe pellgjet naftëmbajtëse.
Kjo përbën një skandal, pasi nëse do të ketë problem kompania, atëherë banka ka të drejtë të zotërojë dhe shesë pasuritë kombëtare të vendit.
Ky skandal ka ndodhur ngaqë kompania kanadeze ka marrë lejen nga organet e shtetit shqiptar, përkatësisht nga Ministria e Energjetikës.
Dhe si për “rastësi” kjo leje është dhënë në periudhën 2009-2013 kur këtë dikaster e ka pasur LSI-ja, me Dritan Priftin në krye në dy vitet e para.
Publikimi i këtij skandali në një media si “Tema” që është afër Ramës, është një sinjal që kreu i qeverisë nuk ka pranuar presionin e Metës, por i kujton vazhdimisht raste që në fakt dalin nga pjesësa të arbitrazhit ndërkombëtar, si CEZ ashtu edhe Bankers, pasi kanadezët kanë hedhur në gjyq shtetin shqiptar.
Por çdo të ndodhë sot? A do të bëhen ndryshimet siç u premtua nga gazeta e Koço Kokëdhimës dhe media pranë LSI-së?
Sipas gjasave, pas ceremonisë së nderimit të oficerit të policisë së vrarë të shtunën në Shkodër, pritet një takim tjetër mes kryeministrit Rama dhe kreut të Kuvendit, Meta. /tesheshi.com/
