Tek Kroi i Vitakut: aty ku ligjin e bën serbi me ndihmën e institucioneve kosovare. Ja se si…

Nga Musa Mustafa

Nazmi Ismaili, përfaqësuesi i lagjes Kroit të Vitakut si dhe kryetar i këshillit të Veriut, është ftuar si i pandehur për t’u marrë në pyetje nga ana e Gjykatës Themelore të Mitrovicës me seli në Vushtrri, për shkak se ka dashur ta rindërtojë shtëpinë e djegur gjatë luftës në Kosovë nga ana e forcave ushtarako-policore dhe paramilitare serbe.

Deri në këtë pikë ka arritur absurdi në verin e Kosovës.

Sepse nga  ana tjetër, po në Kroin e Vitakut, janë ndërtuar 8 blloqe banesash nga ana e strukturave paralele serb, ndërkohë në këtë lagje nuk ka ekzistuar asnjë bllok banimi dhe se të gjithë banorët serbë të tyre ndërtesave janë ardhacakë dhe asnjëherë deri më tani policia e Kosovës askënd nuk e ka denoncuar në Gjykatë.

Dhe sipas Ismailit, ky është rasti i parë që policia e Kosovës denoncon dikë në gjykatë duke e bërë sefte me një shqiptar që dëshirojë ta rindërtojë shtëpinë në tokën e tij, të serbët e kanë djegur dhe shkatërruar.

“Organeve të drejtësisë u jam përgjigjur dhe u kam dhënë shpjegimet e mia se është e drejtë universale që çdo person të gëzojë pronën e tij”, ka thënë Ismaili.

Më tej, ai sqaron se sipas vendimeve të UNHCR-së, BE-së, UNMIK-ut dhe së fundi edhe të Ministrisë së Planifikimit Hapësinor të Kosovës, banorët të cilëve u janë djegur dhe shkatërruar shtëpitë gjatë luftës në Kosovë, kanë të drejtë që të rindërtojnë shtëpinë pa kërkuar leje ndërtimi nga organet komunale.

“Po ju them nga këtu të gjithave institucioneve të Kosovës se banorët shqiptarë të veriut të Mitrovicës, janë të vendosur t’i rindërtojnë shtëpitë dhe të kthehemi në trojet dhe tokat tona”, ka thënë Ismaili.

“Të gjitha banorët shqiptarë të lagjes Kroi i Vitakut, ka shtuar ai,  për t`iu ikur problemeve, kemi aplikuar për lejen ndërtimi të shtëpive në komunën e veriut të Mitrovicës, por tash e 6 muaj nuk na është kthyer asnjë përgjigjeje nga organet serbe të kësaj komune”, ka thënë përfaqësuesi i lagjes, Nazmi Ismaili.

Ai informon duke thënë se “vetëm në lagjen Kroi i Vitakut janë edhe 74 shtëpi të shqiptarëve që janë të djegura nga forcat serbe gjatë luftës. Ato duhet të rindërtohet dhe banorët të kthehen sa më shpejt në shtëpitë e tyre e jo të jetojnë nëpër bodrume e qymeze të Mitrovicës së jugut dhe tërë Kosovës duke paguar edhe qira të majme”.

Por sipas tij, policia e Kosovës në veri të Mitrovicës është duke punuar me urdhra të institucioneve paralele serbe.

“Problemin kryesor në fillimin e rindërtimit të shtëpive të shqiptarëve në Veri e kemi edhe nga policia e Kosovës, e cila direkt është duke punuar me urdhra të Institucioneve paralele të Serbisë që veprojnë në Kosovë”, ka akuzuar Ismaili.

Ismaili kërkon qartësim të pozicioneve të institucioneve të Kosovës rreth kthimit në veri dhe veprim konkret të tyre.

“Apeloj tek të gjitha institucionet e Kosovës që të marrin masa dhe të mos lejojë kolonizimin e veriut të Mitrovicës. Kryeministri, presidentja, ministri i Punëve të Brendshme, duhet të dalin qartë dhe të deklarojë se a janë për kthim të banorëve shqiptarë të veriut të Mitrovicës në shtëpitë e tyre të shkatërruar gjatë luftës apo jo”, ka thënë Ismali.

Ai ka paralajmëruar se kështu si po ndodh, të gjithë banorët do të rifillojnë rindërtimit e shtëpive duke mos ndaluar, ndërsa që të gjitha pasojat do t`i bien mbi institucionet dhe policinë e Kosovës.

Në anën tjetër Hazir Ferati, banori kësaj lagjeje, ka theksuar se policia e Kosovës në veri të Mitrovicës është ajo që po bënë segregacion, nuk lejon rindërtimin e shtëpive të shqiptarë si dhe denoncon ata në Gjykata, ndërsa që serbët vijojnë të ndërtojë lirshëm në këtë lagje, pa patut kurrë ndonjë shtëpi aty, e për më tepër duke qenë ata që ua kanë  djegur apo rrëmbyer shtëpitë shqiptarëve. /tesheshi.com/