Një deklarim i kryeministrit Rama gjatë qëndrimit të fundit në Gjermani, aty ku u përball me sfidën e madhe të hapjes së negociatave, ka sjellë reagim të madh në rrjete nga ana e pjesëtarëve të komunitetit musliman, të cilët, edhe për shkak të një mase frustrimi komunitar gatuar në vite, janë ndjerë të fyer, të përçmuar, të keqpërdorur. Fjala është për deklarimin e Ramës mbi nevojën e hapjes së dyerve të Europës për Shqipërinë, pasi në të kundërt vendi mund të gëlltitej nga Rusia, apo se dhe muslimanët mund të radikalizoheshin.
Pjesën e parë, atë me Rusinë e ka thënë kahera, ashtu troç; por edhe të dytën e ka cekur paksa, ama jo si kësaj here. Megjithatë, ka pretendime nga njerëz të afërt të Ramës se fraza është artikuluar krejt ndryshe dhe në një tjetër kontekst. Marrë ashtu siç është, ajo vërtet bart edhe fyerjen, edhe përçmimin, edhe keqpërdorimin. Por ajo gjithsesi ka qenë e kodifikuar. Ka qenë, siç janë zakonisht një pjesë e frazave në një betejë diplomatike, ku je i detyruar të luash më shumë porta.
Siç dihet dhe siç po shihet, shumë aktorë ballkanas sot, por më së shumti Vuçiç e Rama, janë futur në darën e interesave të mëdha gjeopolitike rajonale e më gjerë, ku protagonisë janë fuqitë me liderët botërore përkatës.
Dhe gjatë vizitës së fundit në Gjermani, jo Tahiri por Turqia ka qenë “molla e mosmarrvëshjeve” – nëse mund ta quajmë kështu – mes kryeministrit shqiptar dhe Berlinit zyrtar. Gati haptazi, Ramës i është kërkuar distancim nga aleanca me Erdoganin, në një kohë kur si para 5 vitesh kur morri pushtetin e si para dy javësh te Sokol Balla, shefi i qeverisë shqiptare e deklaroi gojëplot se Turqia është partneri strategjik i Shqipërisë. Sepse nuk është fjala për një raport njerëzor afeksional mes dy lidërve, por për një lloj partneriteti me efekt në terren. Dy investimet kryesore strategjike në qeverisjen e Ramës vijnë nga Turqia: Air Albania dhe Aeroporti i Vlorës. Janë dy impakte të fuqishme ekonomike të lidhura pazgjidhshmërisht me interesa gjeopolitike. Janë dy lloj investimesh, që po ashtu për kontekste gjeopolitike, nuk mund të vinin kurrë nga Europa, siç Dash Shehu do dëshironte dhe që kanë shkaktuar shumë buzërrudhje duke nisur nga Roma, Berlini e deri te Brukseli.
Ndaj, mesazhi i Ramës me elementët “muslimanë” e “radikalë” brenda, edhe nëse ka qenë literalisht ashtu siç është servirur në përkthim, ka qenë brenda një konteksti diplomatik krejt të huaj për masën, një kartë me kosto për t’u luajtur sa i përket zhvillimeve të brendshme – “Mbasi harxhoi gjithë javën duke sharë dhe sulmuar politikanët gjermanë, pastaj duke akuzuar e ofenduar muslimanët shqiptarë si ekstremistë që mund të shpërthejnë, Edi Rama e mbylli javën duke sulmuar sot për dy orë opozitën”, do deklaronte Paloka i PD-së – por e vetmja në përballje me presionin e jashtëm. Dhe me një presion që ka në qendër Turqinë, Erdoganin, duke iu thënë: largohu prej tij nëse na do neve, Europën!
Sepse siç duhet tashmë, anëtarësimet në BE, shoqëruar nga seti i proceseve integruese, janë tërësisht produkte gjeopolitike dhe nuk kanë të bëjnë fare me standartet e promovuara. Futja në BE e shteteve balltike, si dhe e Rumanisë dhe e Bullgarisë nga Ballkani, ndërkohë që bëhet gati Serbia e Mali i Zi, janë mëse të mjaftueshme për ta kuptuar skemën.
Ndaj deklarata e Ramës, parë në mënyrë horizontale dhe përcjellë ashtu literalisht – pa u komentuar nga ai vetë në radhë të parë – më shumë se abuzuese për një komunitet është dhe idiote. Por parë vertikalisht dhe në një kontekst diplomatik mund të rezultojë dhe inteligjente në plan afatgjatë. Dhe këtu është rasti për ta bërë me dije se është bërë nga një njeri, nga një kryeministër, i cili ka zgjedhur të ketë në paradhomën e tij si këshilltare një femër me shami, diçka e paimagjinueshme deri dje dhe po ashtu e pa bërë publike. Quhet Kiti Shabanaj. /tesheshi.com/
