Autobusi i linjës Prishtinë-Vjenë i kompanisë “Bici” është sulmuar për të dytën herë nga persona të panjohur në Kryshefc të Serbisë.
Lajmin e ka konfirmuar pronari i kësaj kompanie Behxhet Bici, i cili ka bërë thirrje të hetohen këto raste sepse siç ka thënë ai, mund të jenë më qëllime të caktuara.
“Sulmi ka ndodhur në Krushefc rreth orës 10:00, nga disa persona të cilët kanë hedhur një shishe që dyshohet se ka qenë e mbushur me gëlqere”, ka thënë Bici.
Ai ka shpjeguar se pak para sulmit një veturë e ka shoqëruar autobusin dhe pak minua më pas disa persona, të cilët ishin në anë të rrugës kanë sulmuar, duke i dëmtuar gjithë pjesën e përparme të xhamit.
“Autobusi tani është ndalur në vendin ku është sulmuar, sepse lëvizja në atë gjendje ka qenë e pa mundur. Për këtë arsye kemi dërguar një autobus tjetër, i cili është rrugës për të marrë udhëtarët dhe për ti dërguar në destinacionon e tyre”, ka thënë ai, për “Indeksonline”.
Bici ka pohuar se tani kanë njoftuar policisë serbe për incidentin dhe se kanë premtuar se do të nxjerrin nesër raportin për këtë rast.
“Një sulm i ngjashëm na ka ndodhur me datën 10 të këtij muaji në vendin e njëjtë. Na është dëmtuar një xham anësor, por pasi dëmi ishte i vogël dhe nuk kishte të lënduar nuk kemi ndalur fare”, ka treguar Bici.
Sulmin ndaj autobusit me udhëtarë nga Kosova e ka dënuar ashpër ministri i Punëve të Jashtme, Enver Hoxhaj. Ai ka thënë se këto sulme janë bërë sistematike dhe askush nuk po dënohet për to.
“Dënoj ashpër sulmet vandale ndaj qytetarëve të Kosovës që po udhëtonin nëpër Serbi. Këto sulme janë bërë sistematike dhe askush nuk po dënohet për to”, ka shkruar Hoxhaj në Twitter./tesheshi.com/
