Rreth 40 besimtarë muslimanë po falnin namazin e jatsisë në një xhami në Kebek të Kanadasë, kur tre persona me armë kanë hapur zjarr, duke vrarë më së paku pesë vetë.
Ngjarja trishtuese ndodhi në Qendrën Kulturore Islame të Kebekut në orët e mbrëmjes të së dielës.
“Ka shumë viktima,” deklaroi një zëdhënës i policisë së Kebekut, ndërkohë që u lajmërua për dy të arrestuar.
Drejtuesi i Qendrës Kulturore Islame të Kebekut, Mohamed Yangui, që gjendej brenda xhamisë në momentet e sulmit mizor, tha se nuk e dinte se sa ishin të plagosurit, që, sipas tij, ishin dërguar në spitale të ndryshme të qytetit.
“Pse po ngjet kjo këtu? Kjo është barbare,” do të ishte reagimi i tij për ngjarjen.
Një reagim do të vinte dhe nga shtetari numër një i Kebekut, Philippe Couillard, i cili veç dënimit të “kësaj dhune barbare”, do të shprehej përmes një rrjeti social: “Le të bashkohemi kundër dhunës. Solidaritet me qytetarët kebekas të besimit musliman.”
“Kanadezët pikëllohen sonte për të vrarët në një sulm burracak mbi një xhami në Qytetin e Kebekut. Mendja më është te viktimat dhe familjet e tyre,” do të shkruante në Twitter kryeministri kanadez Justin Trudeau.
Ky është incidenti i dytë në të njëjtën xhami, në dyert e së cilës qe lënë një kokë derri në qershorin e vitit të shkuar, gjatë muajit të Ramazanit. /tesheshi.com/
