Jens Stoltenberg u shpreh në vizitën e tij të parë zyrtare në vendin e vet, në Norvegji, se Nato nuk e sheh Rusinë si kërcënim të çastit, të atypëratyshëm, për shtetet anëtare në Balltik dhe në Europën Veriore.
“Ajo çka vëmë re është një paparashikueshmëri, pasiguri dhe nervozitet i shtuar,” i tha shefi i NATO-s transmetuesit shtetëror të Norvegjisë, NRK.
Gjithsesi, Stoltenberg theksoi se shpresonte në një përmirësim të marrëdhënieve me Rusinë.
“Synimi ynë është akoma bashkëpunimi me Rusinë. Kjo i shërben NATO-s, i shërben Rusisë.”
Dje, gjatë një fjale të mbajtur në Universitetin e Oslos, ai e kritikoi sërish Rusinë për dështimin në respektimin e kufijve të fqinjve të saj.
“Parakushti për bashkëpunim me vendet fqinje është respektimi i kufijve të tyre, dhe kjo nuk ka ndodhur kur bëhet fjalë për Rusinë. Gjeorgjia, Moldavia dhe Ukraina janë shembuj të qartë të kësaj, si edhe vendet balltike, që po përballen vazhdimisht me sfida si rezultat i retorikës së Rusisë.”
Stoltenberg do të takohet sot me zyrtarët më të lartë të qeverisë norvegjeze, në përpjekje për t’i bindur për shtimin e shpenzimeve për mbrojtjen në përgjigje të agresivitetit në rritej të Rusisë.
Ish-kryeministri norvegjez lëviz shpesh mes Oslos dhe Brukselit, ku gjenden zyrat qendrore të NATO-s, por kjo është vizita e parë zyrtare e tij në vendin amë. /tesheshi.com/
