Juventusi me Napolin do të takohen sonte në mbrëmje në “Juventus Stadium”. Një ndeshje e veçantë, jo aq për pozitat ku ndodhen skuadrat, se për një emër që e ka çuar në maksimum armiqësinë midis tyre.
Gonzalo Higuain do të luajë sonte kundër ish-ekipit të tij, ku për tre vite u trajtua si një hero; diçka e fshirë tani te napolitanët.
“Tradhtar”, “mercenar”, këto janë epitetet me të cilët identifikohet argjentinasi në Napoli.
“Ai parapëlqeu paratë karshi dashurisë sonë,” shkruante një gazetë napolitane, Il Mattino, gjatë verës.
“Napolitanët u përballën me tradhtinë këtë verë,” deklaronte presidenti i skuadrës së Napolit, Aurelio de Laurentiis.
Sulmuesi 28-vjeçar shënoi 36 gola, një rekord për Serinë A, po sot ai është askushi për napolitanët.
“Do ta përshëndes atë siç bën një baba me të birin që e ka zemëruar,” ka paralajmëruar Maurizio Sarri, trajneri i Napolit.
“Higuain mund të fitojë tituj me Juventusin, por ai humbi mundësinë të bëhej një legjendë te Napoli”, është një tjetër vlerësim për të.
Transferimi i Higuain-it verën e lënë pas ishte më i bujshmi në Itali. Por me gjithë kundërshtitë, edhe pse bluza e tij u dogj rrugëve të Napolit, Higuain ka shprehur vazhdimisht lumturinë për zgjedhjen e tij.
Dy janë përshkrimet më spikatëse për këtë përballje: “Vullkanikja Juventus – Napoli” dhe “Ky është tani rivaliteti më i ashpër në Serinë A”.
Formacionet e mundshme të të dyja skuadrave për sfidën e kësaj mbrëmjeje janë:
Juventus: Buffon, Barzagli, Bonucci, Chiellini, Lichsteiner, Khedira, Lemina, Pjanic, Alex Sandro, Mandzukic, Higuain.
Napoli: Reina, Hysaj, Maksimovic, Koulibaly, Ghoulam, Allan, Diawara, Hamsik, Callejon, Mertens, Insigne. /tesheshi.com/
