Kandidimi i Eduard Selamit për kryetar të Partisë Demokratike ka provokuar një histeri të vërtetë në rrjetin social Facebook, ku është bërë edhe shpallja zyrtare.
Në thuajse të gjithë murin e faqes së Eduard Selamit shfaqen sharje dhe fyerje pa limit ndaj ish-kryetarit të Partisë Demokratike, aktualisht i larguar nga lista për deputet nga kryetarit Basha.
Edhe pse u largua, edhe pse Basha humbi zgjedhjet me rezultat të thellë, i vetmi që nuk e sulmoi Lulzim Bashën ishte pikërisht Eduard Selami, por militanca dukshëm e angazhuar drejt përkrahjeve të tjera brenda opozitës përdor ligjikën e turmës, duke e mallkuar, sulmuar dhe anatemuar me përrallën apo fabulën e Sorosit që e shpikën disa mendje në PD, të drejtuara edhe nga vetë Sali Berisha dhe Lulzim Basha.
Dikush i përmend bashkëshorten, gazetaren Ilva Taren, duke e cilësuar si “careshën e Sorosit” në Shqipëri e të tjera gjëra të fantaksura.
Por ka xhevahire të vërteta në postimet që duken përgjithësisht të orientuara nga grupimi i ish-ëve që kanë kërkuar largimin urgjent të Bashës.
Disa kanë edhe propozime konkrete dhe emri më i kuotuar në murin ku ndodhet shpallja është Flamur Noka. Po, po, ish-ministri i Brendshëm, për të cilin thonë se vetëm ai ka fituar në qarkun e Kukësit dhe i takon që të drejtojë PD-në.
Por realisht ka edhe zëra racionalë që e përkrahin zotin Selami. Bien në sy që dy mbështetës të PD-së nga Tropoja e mbështesin hapur, jo vetëm kandidimin e Eduard Selamit, por edhe fitoren e tij.
Dhe në fakt është krejt normal që çdokush të kandidojë dhe nuk ka pse anatemohet.
Madje edhe kolegu ynë, Endri Xhafo, që njihet si përkrahës i vjetër i së djathtës e quan Selamin si një “Maqolakror”.
Por nëse e marrim precedentin Lakrori, ai ishte i vetmi që kandidoi në vitin 2009 ndaj Edi Ramës, edhe pse humbi. Nëse dikush do të kandidonte tjetër, për shembull edhe Ben Blushi, e njëjtë do të ishte sjellja.
Por etiketimet dhe për më shumë histeritë e tmerrshme pa asnjë pikë edukate që bëhen edhe nga femrat, nuk janë gjë tjetër vetëm sjellje jonormale në një shoqëri që diskuton dhe zgjedh në formë demokratike.
Nëse do të etiketohet dhe kryqëzohet një njeri si Eduard Selami, i cili njihet si i qetë, pa eksese që flet shtruar dhe thotë mendimin e tij, atëherë çdokush që ka staturën e afërt apo të ngjashme me Selamin do të frenohet.
Kujt i mbetet radha?! Atyre “ujqërve të vjetër” të politikës që për 25 vjet e kanë polarizuar, ngarkuar, mbushur ambjentin shqiptar me helm në overdozë që ka shpërndarë toksinat e veta kudo në shoqëri.
Nëse dikush kandidon, përgjigja jepet me votë. Nëse dikush thotë diçka, duhet që t’i jepet përgjigja me fjalë brenda etikës dhe normales.
Ndryshe nuk është politikë apo akoma më shumë parti politike, por një burg i madh ku brenda tij jemi të gjithë që sulmojmë papushim, duke harxhuar e nxjerrë energji negative, në vend që të reflektojmë më parë për atë që themi dhe nxjerrim nga goja.
Edhe nëse i shërbejmë dikujt, apo simpatizojmë dikë është një qëndrim legjitim, mjaft të artikulohet.
A nuk zhvilloheshin edhe në komunizëm “gjuetia e shtrigave” ndaj njerëzve që mendonin ndryshe nga gjyqe publike nëpër lagje e fronte pune?!
I ndjeri, Gramoz Pashko, pikërisht 25 vjet më parë, në Konferencën e Jashtëzakonshme të PD-së, që e kemi botuar të plotë tesheshi.com para dy vitesh, i linçuar nga turmat e ndërsyera do të thërriste:
“Zotërinj! Unë nuk dua aspak t’ju mbush mendjen, sepse e di fare mirë rezultatin përfundimtar të kësaj mbledhje. E di fare mirë që sot, në këtë sallë, nuk vlejnë argumentet. Përfundimi i saj është paravendosur. Por më duhet t’ju kujtoj, se kështu siç po bëni është fati juaj i keq, që po shkruani emrat në një listë, që do të mbetet në historinë e Shqipërisë si lista e atyre, që votuan shkatërrimin e Partisë Demokratike, partisë së parë antikomuniste në Shqipëri. Mbi të gjitha do të jeni përgjegjësit e drejtpërdrejtë të pasojave, që kjo do të sjellë. Nesër, pas kësaj konference ju do të jeni para popullit me gëzimin se shpartalluat të tërë nismëtarët e PD-së, duke iu vënë epitetin se ishin një bandë armiqësore. Në vend që të mblidheni këtu për vështirësitë që ka vendi, se si do ta ndërtojmë këtë vend të shkatërruar, në vend që të diskutonim për ide të reja, për programe të qarta, ju po bëni gjueti shtrigash si në mesjetë”.
/tesheshi.com/
