Prishtinë – Qeveria e Kosovës është duke u angazhuar maksimalisht që t’i parandalojë migrimet masive të qytetarëve të vendit.
Të paktën, kështu beson ministri i Integrimit Evropian, Bekim Çollaku.
Siç bëhet e ditur nga një komunikatë për medie, Çollaku të enjten e ka pritur në takim një delegacion nga Gjermania i rajonit të Baden-Württemberg, të kryesuar nga Ministrat Silke Krebs dhe Peter Friedrich, dhe të shoqëruar nga Ambasadorja Gjermane, Angelika Viets, të cilëve, përveç tjerash iu ka thënë se institucionet e vendit po e parandalojnë emigrimin e qytetarëve në vendet e Bashkimit Evropian.
“Çollaku ka informuar përfaqësuesit gjermanë edhe për angazhimet e institucioneve të Kosovës që të parandalohet plotësisht migrimi i kosovarëve dhe të ndërtohet ardhmëria e tyre në vendin tonë”, thuhet në komunikatën për medie.
Ai është shprehur gjithashtu se viti i shtatë i pavarësisë e gjen Kosovën dukshëm më të konsoliduar dhe më të gatshme për tu ballafaquar me sfidat ekonomike dhe sociale./TeSheshi.com/
