Komunat me shumicë shqiptare në Shkup janë përgatitur për kremtimin e 28 nëntorit. Këto përgatitje janë bërë me para të ndara nga vetë komunat, meqë festa e Ditës së Flamurit kombëtar shqiptar nuk është festë shtetërore, andaj organizimet bëhen nga pushteti lokal ku dominojnë shqiptarët.
Komuna e Çairit me shiritat kuq e zi si 5 vitet e kaluara edhe sivjet ka zbukuruar territorin e saj. Kjo komunë ka organizuar program festiv në mesditë në Sheshin “Skenderbeu” ku do të performojnë ansamblet e këngëve dhe valleve të Shkupit.
Për shkak se shqiptarët kanë se ku ta festojnë festën e 28 nëntorit, Komuna e Sarajit veç flamujve të vendosur në shtyllat e rrugës nuk ka paraparë ndonjë manifestim.
Ndërsa Komuna e Haraçinës gjithashtu me organizim simbolik për festën. Gjithçka që zbukuron këtë komunë janë disa vargje me flamujt kombëtar.
Ajo që vlen të theksohet është se kryetarja e Haraçinës, Milikije Halimi bashkë me stafin e saj do të vizitojnë varrezat e Dëshmorëve të rënë gjatë konfliktit në Maqedoni të vitit 2001 dhe që ndodhet në Haraçinë.
Në Maqedoni, 28 nëntori nuk është festë zyrtare, por e njëjta kremtohet në komunat me shumicë shqiptare të cilat zbukurojnë rrugët me flamuj kombëtar. 28 nëntori gjithashtu festohet edhe në shumë shkolla shqiptare të cilat organizojnë programe të larmishme me karakter kulturor. /tesheshi.com/
