Shqipëria ka nisur një mision, për të shpëtuar refugjatët sirianë, që udhëtojnë përmes detit, drejt vendeve evropiane. Ditën e sotme, anija “Oriku”, u nis nga porti i Durrësit, duke u bërë kështu pjesë e flotës së NATO-s. Ata do të marrin pjesë në një operacion të quajtur “Sea Guardian”.
Të pranishëm ishin ministrja e Mbrojtjes, Mimi Kodheli, zv. shefi i Shtabit, gjeneral brigade Dedë Prenga, komandantët e forcave, ushtarakë dhe familjarë të efektivëve pjesëmarrës në mision.
Gjatë kësaj ceremonie, ministrja Kodheli tha se: “prania jonë në detin Egje, në radhë të parë i takon solidaritetit që Shqipëria tregon ndaj fqinjëve dhe aleatëve. Ushtarakët tanë kanë qenë në çdo pikë të nxehtë të globit, por tani problemet janë afruar në kufinjtë tanë. Dhe ne duhet të jemi aty”.
Ekuipazhi i anijes “Oriku” përbëhet nga 21 ushtarakë të Forcave të Armatosura. Kjo anije do t’i bashkohet Greqisë dhe Turqisë, të cilët nën komandën e hollandezëve do të vijojnë kryerjen e operacioneve të NATO-s.
“Oriku” është një ndër pesë anijet e flotës detare shqiptare, e cila ka mision patrullimin dhe ardhjen në ndihmë në raste fatkeqësish detare. /tesheshi.com
