Presidenti Thaçi morri dekoratën e të qënit “Qytetar nderi” në Krumë të Hasit, nga ku përcolli mesazhet e bashkimit kombëtar në një të ardhme. Por njëherësh, edhe aty Thaçi promovoi idenë e tij të korrigjimit të kufirit, duke shpallur se Lugina duhet dhe do t’i kalojë Kosovës.
“Ju keni qenë bashkërisht në istikamet e luftës dhe bashkërisht do të jetojmë në liri, dhe bashkërisht do të jetojmë në të ardhmen e afërt në një shtet të përbashkët Kosovë-Shqipëri. Të jeni të sigurtë që shumë e lehtë është realizmi i ëndrrës që të kemi një hapësirë pa kufi mes Kosovës dhe Shqipërisë, sesa që ka qenë sfida e largimit të Serbisë nga Kosova dhe kjo do të ndodh… Ju e dini botërisht dhe e ritheksoj edhe sot këtu në mesin e burrave të Hasit dhe grave, zotimin tim dhe përkushtimin tim jetësor që Presheva, Medvegja dhe Bujanoci t’i bashkëngjiten territorit të Republikës së Kosovës pa u cenuar asnjë milimetër e territorit të Republikës së Kosovës, as Trepça, as Ujmani, as Mitrovica, asnjë cep i territorit të Kosovës si parakusht për bashkim kombëtar”, tha presidenti kosovar.
Thaçi tha se ndjehet shumë mirënjohës që iu dha titulli “Qytetar Nderi” dhe pikërisht në Has.
“E njoh këtë trevë, i njoh këto familje, fshatrat përreth, gjërë e gjatë këto hapësira të mrekullueshme shqiptare të ndara padrejtësisht me pikat kufitare që ende ekzistojnë, por ajo që dua të them është kjo, kurrë në jetë nuk do të harroj dhe gjithmonë do ta kultivoj kudo që kam mundësi nga familja dhe gjeneratat e ardhshme të Kosovës, se këta njerëz, këtu në Krumë, në Has, janë njerëz të bukës, të besës, të pushkës, janë njerëz të çlirimit”, tha Thaçi. /tesheshi.com/
