Presidenti rus Vladimir Putin shpalli një armëpushim të Pashkëve, njoftoi Kremlini.
Pala ruse pezullon të gjitha operacionet ushtarake nga ora 18:00 e datës 19 prill deri në orën 00:00 të datës 21 prill.
“Në bazë të arsyeve humanitare, sot nga ora 18:00 deri në mesnatë nga e diela në të hënë, pala ruse shpall armëpushimin e Pashkëve, urdhëroj pezullimin e të gjitha operacioneve ushtarake për këtë periudhë.
Ne besojmë se pala ukrainase do të ndjekë shembullin tonë. Në të njëjtën kohë, njësitë tona duhet të jenë të gatshme për të zmbrapsur shkeljet e mundshme të armëpushimit dhe provokimet”, thuhet në njoftim.
Zelensky: “Zjarri i artilerisë ruse vazhdon”
Në reagim, presidenti ukrainas Volodymyr Zelensky tha se, sipas komandantit të tij të përgjithshëm, zjarri i artilerisë ruse nuk ishte ndalur pavarësisht se Kremlini shpalli një armëpushim të Pashkëve.
“Në këtë moment, sipas raporteve nga Komandanti Suprem, operacionet ofensive ruse në disa sektorë të frontit dhe zjarri i artilerisë ruse, nuk janë ndalur”, ka shkruar Zelensky në X.
“Prandaj, nuk ka besim në fjalët që vijnë nga Moska”.
Ai kujtoi se si Rusia hodhi poshtë një propozim të SHBA-së për një armëpushim 30-ditor muajin e kaluar dhe tha se nëse Moska “pajtohet vërtet për një armëpushim të plotë dhe të pakushtëzuar, Ukraina do të veprojë në përputhje me rrethanat, duke pasqyruar veprimet e Rusisë”.
“Nëse vërtet ka një armëpushim të plotë, Ukraina propozon që ai të mbahet pas Pashkëve më 20 prill”, shkroi Zelensky. /tesheshi.com/
