Qeveria e Maqedonisë, nëpërmjet shërbimit sekret të shtetit ka përgjuar mbi njëqind gazetarë me qasje kritike ndaj pushtetit, nga të cilët, dosjen më të madhe ka për gazetarin dhe pronarin e javores FOKUS Nikolla Mlladenov, i cili vdiq në aksident trafiku në vitin 2013, në rrethana misterioze.
Këto të dhëna, i shpalosi në një konferencë për mediat lideri i opozitës maqedonase Zoran Zaev, ndërkohë që mbante në dorë dosjet e gazetarëve të përpiluara nga shërbimet sekrete. Të njëjtat tha se do t`u dorëzohen gazetarëve të përgjuar.
Nga incizimet e prezantuara, ishte edhe biseda telefonike e kryeministrit Gruevski me ministrin për Transport dhe Lidhje, Mile Janakievski, në të cilën kryeministri kërkoi fond në vlerë prej 500 mijë euro, të cilat do të përdoren për incizimin e disa filmave dokumentarë, nën prefiksin patriotik, të cilat do të shfaqen në një media të afërt me pushtetin.
Opozita shpalosi gjashtë përgjime, të cilat kishin për qëllim të dëshmojnë lidhjen e ngushtë të pushtetit me mediat kryesore në vend, duke prezentuar incizime telefonike në të cilat kërcënohen gazetarë me largim nga puna, ndërsa në disa tjera, se si ministra qeveritarë kryeredaktorëve televiziv u caktojnë agjendën dhe prioritetin e lajmeve që duhet emetuar. Sipas Zaevit e vërteta për Maqedoninë është shumë e dhimbshme, e rëndë dhe e papranueshme për një njeri normal.
Preskonferenca e radhës, do të prezentojë material akoma më shokuese, paralajmërojnë nga LSDM-ja. /tesheshi.com/
