Një nga temat më të përfolura në Kosovë aktualisht është shkëmbimi i territoreve me Serbinë. Presidenti Hashim Thaçi deklaroi se nuk do të ketë ndarje të Kosovës, më pas e përmendi mundësinë e “korrigjimit të kufijve”, që po nënkuptohet si shkëmbim territoresh me Serbinë.
Disa qytetarë të Kosovës, të intervistuar sot nga “Kosovapress”, janë shprehur kundër shkëmbimit të territoreve ose shkëputjes së Mitrovicës së veriut nga Kosova.
Disa prej tyre mendojnë që Lugina e Preshevës do t’i kthehet Kosovës, prandaj nuk duhet të shkëmbehet me Mitrovicën e veriut.
Ismajl Hamiti thotë se jo që nuk duhet të ketë shkëmbim territoresh por sipas tij me ngulm duhet të ruhen edhe ato aktualisht i ka Kosova.
“Kuptohet, me veriun e Kosovës, absolutisht pa veriun jo, sepse nëse i ruajmë këto territore, gjasat janë që ato të vijnë, Presheva, Bujanovci, Lugina”, ka thënë Hamiti.
Shaban Krasniqi mendon se kjo ide nuk është aspak e mirë. Ai ka drojën se shqiptarët gjithnjë do të dalin humbës, duke pasur parasysh edhe të kaluarën.
“Nuk besoj që është ide e mirë. Se t’u i ditë politikat serbe, gjithmonë, në krahasim me politikat tona shqiptare, dalim humbës. Kështu që, së paku jo me këta politikanë që i kemi sot”, ka thënë Krasniqi.
Kundër shkëmbimit të territoreve është shprehur edhe Naser Shabani.
“Jo, kurrsesi. Se është vendi jonë, vendi i shqiptarëve”, thotë Shabani.
Qytetarja Sanije Selmani e cila edhe është asambliste në një qytet të Suedisë nuk pajtohet me, siç i quan ajo, lojëra që po i bën politika kosovare.
“I përcjellë rregullisht lajmet në televizionet shqiptare. Megjithëse edhe vetë jam politikane, jam asambleiste në një komunë të Suedisë, aty ku jetoj. Na vjen shumë keq që këto lojëra po zgjasin kaq shumë dhe Evropa po luan gjithmonë, po sjellë lojëra të ndyta një kurrizin e shqiptarëve të Kosovës”, ka thënë Selmani.
Ndërsa Haki Shala mendon se Serbia edhe në të kaluarën ka marr territore prej Kosovës, e që sipas tij tash nuk duhet të lejohet.
“Sipas mendimit tim nuk duhet me pas shkëmbim territoresh se nuk ka nevojë, se mjaft na ka marrë Serbia prej Mollës Kuqe deri në Mitrovicë e ka marrë njëherë, e tash me marrë prapë po m’ doket dy herë është e tepërt. Mjafton me i lanë kufijtë ku janë dhe me i respektuar drejtat e njeriut, sikur Serbia për shqiptarë ashtu edhe Kosova për serbët”, ka thënë Shala.
Ndërkaq, Januz Rusinovci mendon se krejt pasuria e Kosovës është në Mitrovicë dhe pikërisht për këtë nuk duhet të lejohet shkëmbimi i territoreve.
“Jo, jo, absolutisht jo. Krejt lufta është bë për atë Mitrovicë, krejt pasuria është aty. Lugina e Preshevës, ajo nuk kthehet, veç këto janë portalet që shkrujnë edhe pollavra të njerëzve, se nuk e besoj, se nuk t’lanë maspari amerikanët as anglezët me ba këtë punë. Se sa për shkak t’neve, jo shkëmbimi, po merret krejt. Po edhe KFORI-i është këtu”, ka thënë Rusinovci. /tesheshi.com/
