Një hetim i papritur, i publikuar këto ditë nga prokuroria dhe policia, ka nxjerrë edhe emrin e Gjergj Bojaxhiut, i cili një vit më parë tronditi politikën tradicionale, duke marrë 16 për qind të votave në Tiranë, në zgjedhjet lokale, pa fushatë dhe me duar në xhepa.
Në raportin e servirur për mediat nga njerëz të prokurorisë bëhet e ditur se Bojaxhiu është një prej njerëzve që po hetohen për pastrim parash dhe fshehje të të ardhurave.
Gjergj Bojaxhiu ka prej vitesh një aktivitet në Vlorë, ku grumbullon naftën nga shitës të ndryshëm dhe e rishet atë në vendet e Europës. Bashkë me të janë aksionerë dhe shumë shtetas kroatë, italianë, etj.
Vetëm Bojaxhiu e ka cilësuar këtë “dosje të servirur” si një shantazh politik.
“Për çerekshekulli, të dy krahët e politikës së vjetër kanë hedhur baltë kundër çdo zëri kritik. Kësaj radhe po e hedhin këtë baltë ndaj meje. Në qoftë se do të isha përzier me ato që më akuzojnë, si shtetas amerikan do të kishte qenë shteti amerikan i pari që do të më kishte hetuar,” ka deklaruar Bojaxhiu.
Sipas tij, kjo kastë politike po u jep një mesazh të qartë të gjithë atyre që guxojnë ta sfidojnë këtë sistem politik të kapur.
“Sot sulmohem unë, nesër dikush tjetër,” thekson në reagimin e tij Gjergj Bojaxhiu.
Në mënyrë të qartë e të prerë, ai përmend qenien e tij si shtetas amerikan, duke nënkuptuar këtu dhe fushatën antikorrupsion të udhëhequr prej qeverisë së SHBA-ve.
Po realisht çfarë synon sulmi ndaj Bojaxhiut?
Në zgjedhjet vendore të Tiranës, ai me nismën qytetare arriti të marrë 16% të votave pa asnjë lek dhe reklamë, por vetëm me disa takime normale me zgjedhësit. Trendi i sondazheve që po bëjnë partitë e mëdha tregon se po rritet gjithnjë e më shumë një elektorat jo i rreshtuar majtas apo djathtas, që do të votonte për njerëz të moderuar si Bojaxhiu.
Në qarqet e Tiranës po flitet gjithnjë e më shumë se me të do të bashkohen dhe Ben Blushi e Mimoza Hafizi, në një lëvizje që mund të regjistrohet si listë elektorale.
Por nëse kandidon në zgjedhje, nga do t’i marrë votat Gjergj Bojaxhiu? Kush shqetësohet prej pranisë së tij?
Sulmi që bëhet nga prokuroria ka krijuar përshtypjen e lidhjeve të këtij institucioni me Berishën dhe Metën, pasi njerëzit dhe kuadrot në organin e akuzës kanë lëvizur sipas simpative që kanë ish-kryeministri dhe kreu i Kuvendit.
Rasti më i fundit ishte “hakmarrja” ndaj një prej prokurorëve të 21 Janarit, Shkëlqim Hajdarit, i cili kishte kërkuar rekurs në Gjykatë të Lartë për të rrëzuar vendimin e Gjykatës së Apelit.
Pikërisht këto fakte kanë krijuar një lidhje me ngjarjen që ka protagonist Gjergj Bojaxhiun.
Tjetër fakt është se, në 21 qershor 2015, Bojaxhiu mori vota vetëm nga i ashtuquajturi elektorat “gri”, që herë voton majtas e herë djathtas.
Ky elektorat ka qenë objektiv i LSI-së, sidomos në zgjedhjet e vitit 2013, për të bërë një tërheqje më pas.
Sondazhet e kryera nga palët tregojnë një tendencë se publiku nuk ka besim as te qeveria, as te opozita, ndaj kërkon fytyra dhe aktorë të rinj politikë.
Pikërisht kjo e dhënë nxit përpjekjen për ta ndaluar Gjergj Bojaxhiun të ngjisë “Everestin” e politikës shqiptare, pasi ish-zëvendësministri i Energjetikës e ka ngjitur me kohë atë të vërtetin. /tesheshi.com/
