Prej orëve të para të mëngjesit të së premtes, një turmë e vogël operatorësh “ngulen” stativët e aparateve e më pas instaluan kamerat me objektiv të drejtuar për nga porta e hyrjes së ish-vilës së Mehmet Shehut, sot vilë qeveritare, ku kishin ardhur ushtarakët më të lartë të Gardës së Republikës. Ndërkohë që kolegët gazetarë shkuan për një kafe aty afër, më pritje të ndonjë sms-je apo zileje lajmëruese të tipit “dolën”.
Tek “Vila 31” si çdo të premte, Edi Rama dhe Ilir Meta kryejnë “ritin” e konsumimit të një drekë pune të ofruar nga qeveria për të diskutuar mbi koalicionin dhe për të dalë para kamerave, duke përcjellë një mesazh që “dy të mëdhenjtë” nuk kanë asnjë problem por gjithçka shkon vaj.
Një lojë cici-mici që synon të fshehë një problem që ekziston mes mazhorancës: PS-ja dhe LSI-ja kanë opinione dhe lëvizje të ndryshme për reformën në Drejtësi. Këtë e dëshmoi edhe takimi i djeshëm i ambasadorit të SHBA-së, Donald Lu, në zyrën e Ilir Metës që zgjati mbi 3 orë.
Që të ketë qëndrime të ndryshme është brenda normalitetit politik, por këto qëndrime dhe probleme duhet të bëhen publike bashkë me arsyetimin përkatës.
Problemi tjetër është gjetiu: dy partitë apo edhe liderët e mazhorancës, janë zgjedhur për të drejtuar institucionet, të cilat janë pjesë e përfaqësimit popullor edhe si imazh.
Vetë “adeti” i xhumasë në vilën e ish-kryeministrit që humbi jetën për të mos qenë pasardhësi i Enver Hoxhës, është një gjest i pakuptimtë dhe në dukje arrogant.
Prej dy muajsh, politikës shqiptare i është veshur një simbol politik që ngjan me ca republika putiniste ish-sovjetike; apo që kërkohet të imitohet një “Dollmabaçe” e Tiranës ku Shqipëria nuk prodhon vetë as prasin, ku më shumë se gjysma e parave të arkës së shtetit janë marrë borxh; dhe simbolika e konsumimit të fondeve për pritje e përcjellje ngjan me kohën e diktaturës kur një grup i caktuar njerëzish e blinin mishin, djathin, kafen apo portokallët në dyqane të veçanta dhe hanin cilësi më të mirë se pjesa tjetër e popullit. Nëse Fatos Nano i bëntë takimet nëpër lokalet më luksoze të Tiranës ku dëndej në ushqim e alkol dhe pas 5 orësh përtypjeje ngërdheshej para kamerave, sot krerët e së majtës japin sërish imazhin e një Gauche caviar, për të cilën në fakt Edi Rama po kritikohet vazhdimisht nga Ben Blushi dhe Dritan Hila.
Është krejt normale një takim i thjeshtë në zyrat e institucioneve ku politikanët takohen, diskutojnë e në fund i bëjnë të gjitha transparente, jo batutat pasi askujt nuk i duhet jeta e tyre private, por çdo të bëjnë për publikun; në këtë rast, çfarë kanë ndërmend të bëjnë me shumicën dërmuese që i dhanë shqiptarët më 23 qershor 2013.
Sa për adetin nëpër vilat qeveritare, është një fakt për t’u investiguar nga gazetarët se sa janë harxhuar fondet e destinuara për mysafirët e huaj që vizitojnë Shqipërinë.
Sipas të dhënave të Open Data, gjatë 2015-s Kryeministria ka tejkaluar për nga sasia e parave fondet për pritje. Këshilli i Ministrave ka paguar plotë 53 milionë lekë të reja për dreka, darka e të tjera. Dikujt mund t’i duken pak, por janë gati 470 mijë dollarë, pra gjysëm milioni…
/tesheshi.com/
