Një zëdhënës i Departamentit të Shtetit tha se Kosova dhe Serbia janë vende sovrane që kanë të drejtë të vendosin prioritetet e tyre të politikës së jashtme.
Në një përgjigje të shkurtër ndaj një hetimi të Zërit të Amerikës, Departamenti i Shtetit tha se moratoriumi një vetëfrenimi politik në kuadër të Marrëveshjes së Uashingtonit ishte krijuar për të zgjeruar hapësirën për bisedime dhe kompromis midis Kosovës dhe Serbisë. Reagimi amerikan erdhi pas deklaratës së presidentit serb Aleksandar Vuçiç se kërkesa e Kosovës për t’u anëtarësuar në Këshillin e Evropës shkelte dispozitat e Marrëveshjes së Uashingtonit.
“Ne ende besojmë se dialogu për normalizimin e marrëdhënieve, nën kujdesin e Bashkimit Evropian, është vendimtar për të dy vendet për të zhbllokuar të ardhmen e tyre evropiane. Bëjmë thirrje për pjesëmarrjen e tyre urgjente, fleksibile dhe serioze në atë proces”, thuhet në reagim.
Pasi ministrja e Jashtme Kosovës, Donika Gervall paraqiti një kërkesë zyrtare për anëtarësimin e Kosovës në Këshillin e Evropës të enjten, Vuçiç tha se Prishtina e kishte shkelur brutalisht marrëveshjen e Uashingtonit.
Me Marrëveshjen e Uashingtonit të nënshkruar në shtator 2020, Serbia dhe Kosova u angazhuan në dokumente të veçanta për bashkëpunim ekonomik, por edhe për bashkëpunim me Shtetet e Bashkuara.
Marrëveshja përfshinte një moratorium një vjeçar ndaj Kosovës që të përmbahej nga aplikimi për anëtarësim në organizatat ndërkombëtare, si dhe Beogradit që të përmbahej nga një fushatë diplomatike për të tërhequr njohjen e pavarësisë së Kosovës. Moratoriumi skadoi më 4 shtator 2021.
Administrata Biden ka pranuar zotimet nga marrëveshja e Uashingtonit, të cilën e ka konfirmuar disa herë vitin e kaluar edhe ambasadori amerikan në Kosovë, Philip Cosnett. /tesheshi.com/
