Kandidati i parë që ka hyrë në garë për kryetar të PD-së, Eduard Selami, ka bërë sot një deklaratë për mediat ku sqaron arsyet e këtij kandidimi.
Deklarata e tij ka sjellë një model qytetar, krejt ndryshe nga ai që njeh politika shqiptare, ku nuk shahet dhe linçohet kundërshtari, por ofrohet një alternativë ndryshe nga e kundërshtarit.
“Mendoj se këto janë periudha sa të vështira, aq dhe të pasura me oportunitet për ta ngritur PD aty ku janë vlerat më të mira të demokracisë dhe të partive bashkëkohore”, ka deklaruar Selami.
Sipas tij PD ka mbetur mbrapa në kohë dhe tani më shumë se kurrë është mundësia që ajo të ecë me hapin e kohës.
“Është për të ardhur keq që PD-në koha e ka lënë mbrapa. PD duhet të ecë me hapin e kohës. Unë jam i sigurt se kjo ditë do të vijë dhe ky do të jetë kontributi im nëse zgjidhem. Unë do jap kontributin tim që kjo të jetë një garë një model jo vetëm për lidershipin e PD, por për të kthyer besimin tek qytetarët dhe për ta cuar Shqipërinë aty ku ajo meriton”, tha ndër të tjera Selami.
Kur gazetarët e kanë pyetur për Bashën ai u përgjigj se: “Siç merr kreditet më të mëdha kur fiton, ashtu i merr edhe në rast humbjeje. Por natyrisht kjo nuk është vetëm përgjegjësi e Lulzim Bashës.
Para se Selami të jepte arsyet e kandidimit një tjetër kritike e Bashës në parti, ish-deputetja Majlinda Bregu e ka sulmuar kryetarin dhe ka kërkuar dorëheqjen e tij nga drejtimi i partisë.
“Unë kur kërkoj dorëheqjen e Lulzim Bashës, nuk kam asnjë dëshirë të merrem me personazhin në vetvete. Kërkoj heqjen dorë nga një qasje qorre dhe shurdhe e drejtimit dhe funksionimit të PD-së. Nga një mënyrë që e ka në përmbajtjen e saj vetëshkatërrimin e ngadaltë, por të pandalshëm të çfardo organizate, pavarësisht emrit që ka”, u shpreh Bregu.
Ajo më tej ka bërë krahasimin e Bashës me ish-kryetarin Berisha.
“Kur kam thënë dhe stërthënë se Sali Berisha nuk përsëritet, nuk imitohet, nuk zëvendësohet, nuk kam folur për një idhull por për një lidership karizmatik, i cili s’lejon të duken boshllëqet, gropat, defektet e organizatës dhe i mbyll ato. Të pretendosh ta drejtosh PD-në si Sali Berisha, pa qenë ti vetë Sali Berisha, do të thotë të gënjesh vetën e të marshosh verbërisht drejt greminës “
Bregu ka kritikuar dhe garën për kryetar të ri duke e cilësuar një farsë.
“Të shpallësh një garë në mbi 40 grade, tamam kur dynjaja se ka mendjen fare tek ky hall dhe ta bësh këtë, pa bërë një mbledhje të të paktën atyre që u fshinë e atyre që u graduan në një mesnatë, pa përcaktuar në një udhëzim se cilat jane garancite për kandidatët që do hyjnë në garë, pa caktuar standartet për zgjedhje të lira e të ndershme brenda partisë tënde, është jo demokratike!
Është njëlloj sikur Lulzim Basha të hynte në zgjedhje parlamentare pa Kod Zgjedhor! Më e pakta! Ta konceptosh këtë moment si momentin kur PD-ja duhet të ndahet: me Lulzimin “e ngrirë”apo kundër Lulzimit “të shkrirë”, është gabim. “- thekson ajo. /tesheshi.com/
