Ka mbërritur paralajmërimi i fundit i UEFA-s për Rusinë. Ajo mund të përjashtohet nga Euro 2016 nëse tifozët e saj shkaktojnë rishtas dhunë në Francë, siç kanë bërë deri tani.
Një gjobë prej 150.000 eurosh është bashkëshoqëruar me paralajmërimin, e cila do të paguhet për skenat e dhunshme që krijuan tifozët rusë në ndeshjen me Anglinë të shtunën e shkuar në Marsejë. E bëhet fjalë vetëm për përplasjet fizike brenda dyerve të stadiumit.
Gjatë trazirave treditore në Marsejë u plagosën 35 persona, një pjesë e mirë e të cilëve tifozë anglezë, e pati 20 të arrestuar.
Veç kësaj, për shkak të trazirave të krijuara, një grup tifozësh rusë janë nxjerrë jashtë Francës. Policia e vendit organizator është ndërkohë në një operacion për të arrestuar 40 tifozë të tjerë rusë.
Anglia dhe Rusia gjenden në grupin B në këtë kampionat europian, dhe ekziston frika që dy tifozeritë të përplasen përsëri në Lilë. Rusia dhe Sllovakia do të ndeshen të mërkurën në stadiumin e këtij qyteti, e po aty do të mblidhen tifozët e Anglisë, që një ditë më pas do të luajë ndaj Uellsit në Lens.
Dislokimi i 2.400 forcave policore e të xhandarmërisë në Lens është bërë me synimin për të shmangur çdo akt dhune.
Sllovakia, nëpërmjet zyrtarëve të saj të futbollit, u ka kërkuar tifozëve sllovakë të qëndrojnë larg atyre rusë e anglezë në Lilë e Lens. /tesheshi.com/
