Rrugë-morti Fushë Krujë – Milot: ja si mund të takohesh lehtësisht me vdekjen

Ajo mund të konsiderohet dhe si një rrugë-mort. Prej më shumë se 20 vjetësh ka korrur sa e sa jetë njerëzore, e që, duke vijuar të jetë ende në një gjendje të mjerë, vdekjen e ka akoma mbi krye apo rrafsh mbi asfalt, jo aq të rrafshët gjithsesi.

Bëhet fjalë për aksin Fushë Krujë – Milot, e që si për ironi i përket Rugës së Kombit; por sikur dhe dy fshatra të lidhte e jo më dy pjesë të atdheut, do ishte e padenjë.

Sezoni veror po afron, dhe në një pjesë të këtij segmenti gjendja është e tillë sa të paralajmëron ferrin e ditëve të nxehta, ku vargani i gjatë i automjeteve që vijnë nga Kosova do heq zinë.

Problemet që ka ky aksi nuk ke nga t’i zësh, por po ndalemi në një prej tyre: rrethrrotullin provizor të vendosur në kryqëzimin e Milotit, aty ku devijohet udhëtimi drejt Kosovës.

Si pasojë e mungesës së sinjalistikës, orientimi aty shpeshherë bëhet në mënyrë të gabuar, aq sa është e pamundur që, në qoftë kosovar drejtuesi, të mos i del prej gjoksi një “kuku, brej nonën!”.

Pak më tutje syri të kap devijimin e rrugës pasi punimet nuk kanë përfunduar; dhe nga ky devijim kanë gjetur vdekjen edhe dy persona, gjë që dëshmohet edhe përmes lapidarëve.

Më tej, nga Miloti në Thumanë, në një pjesë të madhe të autostradës të njërit kah mungojnë fare barrierat anësore. Efektivët e policisë kanë shtuar patrullat nëpër rrugë për të minimizuar rrezikun e aksidenteve, por sipas ekspertëve kjo është e pamjaftueshme, ndaj policia do të denoncojë në prokurori Autoritetin Kombëtar të Rrugëve për një tjetër problem në aksin që është i përfshirë si “njollë e zezë” në hartën e aksidenteve rrugore: mungesa e mbikalimeve.

Kjo bën që banorët shpesh të  kalojnë në krahun tjetër duke hipur mbi parmakë duke u përshëndetur me vdekjen, ku fatlumturisht ndodh që jo gjithnjë ajo i merr me vete.

Por ka dhe raste kur me vdekjen takohen nga përtesa, ajo tipike shqiptare e papërgjegjshmërisë. Kështu, pranë kryqëzimit të Patokut, ata kalojnë nga njëri krah në tjetrin, pasi përtojnë të ngjiten mbi urë. Si pasojë, ka patur dhe viktima. Pra që renditen tek përtesa si shkak për ikjen nga botë.

Tej të gjitha këtyre sa përmendëm mbi këtë rrugë-mort, tashmë sezoni që po vjen e bën situatën edhe më të ankthshme.

Nga Fushë Kruja e deri në Milot, ndjesia e këndshme e udhëtimit për arsye turistike, është diçka që nuk ekziston; vetëm nëse i qasesh nga paradigm se rruga drejt parajsës kalon nga ferri!

A.Zani – /tesheshi.com/