Qeveria britanike thotë se është gati të ndërmarrë veprime ligjore kundër ish-pronarit të Chelsea, Roman Abramovich, për të siguruar që 2.5 miliardë paundët nga shitja e klubit të shkojnë për ndihmë humanitare në Ukrainë.
Të ardhurat nga shitja janë ngrirë në një llogari bankare në Mbretërinë e Bashkuar që nga viti 2022, kur oligarku rus u vu nën sanksione pas pushtimit rus të Ukrainës.
Qeveria e Mbretërisë së Bashkuar këmbëngul që paratë duhet të përdoren vetëm për të mbështetur ata që vuajnë brenda Ukrainës. Megjithatë, vetë Abramoviç ka shprehur qëllimin që paratë duhet t’u ndahen “të gjitha viktimave të luftës në Ukrainë”, përfshirë dhe qytetarët rusë.
Në një deklaratë të përbashkët, Kancelarja e Thesarit Rachel Reeves dhe Sekretari i Jashtëm David Lamy thanë: “Ndërsa dera e negociatave mbetet e hapur, ne jemi plotësisht të përgatitur të ndërmarrim veprime ligjore nëse është e nevojshme.” Ata vunë në dukje se përparësia e qeverisë është “të sigurojë që njerëzit që vuajnë në Ukrainë të përfitojnë nga këto të ardhura sa më shpejt të jetë e mundur”.
“Qeveria është e vendosur që të ardhurat nga shitja e Chelsea të shkojnë për kauza humanitare në Ukrainë, pas pushtimit të paligjshëm të Rusisë. Jemi thellësisht të zhgënjyer që një marrëveshje me z. Abramovich nuk është arritur ende”, shtoi deklarata.
Në zemër të vonesës është një mosmarrëveshje ligjore midis qeverisë britanike dhe përfaqësuesve ligjorë të miliarderit rus. Abramovich, i cili e bëri pasurinë e tij përmes naftës dhe gazit, i ishte dhënë leje e posaçme për të vazhduar me shitjen e Chelsea, me kusht që ai të mos përfitonte personalisht nga procesi.
Pavarësisht sanksioneve, paratë nga shitja ende i përkasin ligjërisht atij, por ai nuk ka të drejtë t’u qaset atyre. Kur ai njoftoi qëllimin e tij për të shitur klubin, ai tha se të ardhurat do të kanalizoheshin përmes një fondacioni “për të mbështetur të gjitha viktimat e luftës në Ukrainë”, një frazë që përfshin edhe palën ruse.
Ky qëndrim ka shkaktuar reagime të forta në Mbretërinë e Bashkuar. Një komision i Dhomës së Lordëve theksoi vitin e kaluar se ishte “e pakuptueshme” që premtimi i Abramovich-it nuk ishte përmbushur ende dhe paratë mbeteshin të bllokuara. “Ky bllokim ekspozon si z. Abramovich ashtu edhe qeverinë, e cila duhet të kishte kërkuar një marrëveshje më detyruese“, vuri në dukje raporti i komisionit. /tesheshi.com/
