Gazetari spanjoll Carlos Quilez tha se ka intervistuar kreun e një mafieje shqiptaro-kosovare, emrin e të cilit nuk e bën të ditur, i cili grabiti banesat e futbollistëve më të mirë të botës.
Ndër shtëpitë që ai ka hyrë si i paftuar janë ato të Karim Benzemas, Cristiano Ronaldos dhe Johan Cruyff.
Kreu i kësaj mafieje hajdutësh pranoi në një intervistë për El Espanol se pas tij ka një ushtri hajdutësh me mbi 100 persona.
“Në shtëpinë e Johan Cruyff, unë vodha një orë që i përkiste Dennis Bergkamp, disa xhingla Hermes… dhe rreth 20 mijë euro plaçkë. Ishte një shtëpi anësore. Nuk kishte kamera sigurie apo alarme. Kur hyra e kuptova se shtëpia e kujt ishte” , tha kryemafi dhe shtoi:
“Ne ishim edhe pas grabitjes së shtëpisë së Cristiano Ronaldo-s në Madeira, por plaçka nuk ishte interesante. Rrjetet sociale janë armiku numër një i të famshmëve. Dua të them vetëm se nuk e kam grabitur shtëpinë e Sergio Ramos, ata e dinë se kush e ka bërë atë.”
Ai ka treguar se ka pasur rastin të grabisë shtëpinë e Lionel Messit në Paris më shumë se një vit më parë, por nuk ka dashur ta bëjë këtë për respekt.
“Unë ndalova disa herë njerëz që donin të hynin në shtëpinë e Messit. E bëra dhe jam krenar. Nuk e bëra për respekt për Messin. Sepse e dua, pikë”, tha mafiozi pa emër. /tesheshi.com/
