Nga Blendi Gashi
Publikimi i një fotoje në media teksa pjesëtarët e Forcës së Sigurisë së Kosovës (FSK) po kryenin faljen e namazit të xhumasë në një nga kazermat e kësaj force, dhe më pas shkrimet se ministria në fjalë ka ndaluar kryerjen e riteve fetare brenda kazermave, ka çuar pluhur të madh në opinionin publik në Kosovë.
E gjitha filloi kur zhurrmëbërësja Express botoi një shkrim me titull “Ministër, a janë ushtarë a imamë?” (pse, a duhet të jesh patjetër imam që të falesh?!), shoqëruar me foton përkatëse ku disa pjesëtarë të FSK-së kryenin faljen e xhumasë.
Pak orë më pas e njëjta medie, por jo vetëm duke iu referuar një ish-ushtari të FSK-së, raportoi se Ministria që udhëhiqet nga Haki Demolli ka marrë vendim të ndalojë praktikimin e riteve fetare brenda orarit të punës në kazermat e FSK-së.
Por ndonëse kjo ministri zyrtarisht nuk dha ndonjë infromatë zyrtare për të ashtuquajturin vendim, lajmi mori dhenë në shumicën e portaleve online, ku më pas pasuan reagime të mëdha në opinion duke e vlerësuar këtë si një padrejtësi të madhe dhe shkelje e të drejtave në besim të qytetarëve të vendit, në këtë rast të pjesëtarëve të FSK-së, kur dihet se në bazë të konventave ndërkombëtare është e garantuar e drejta në besim.
Këto reagime të mëdha në të cilat u përfshinë qytetarë, analistë e gazetarë, erdhën duke pasur në mendje ndalimin që pikërisht MFSK-ja që udhëhiqej nga Agim Çeku, më 2010 mori një vendim të përkohshëm që ndaloi praktikimin e riteve fetare brenda orarit të punës.
MFSK: Masë e përkohshme vetëm për një njësi
Për të raportuar dhe informuar drejt dhe saktë qytetarët, portali tesheshi.com ka kontaktuar me drejtuesit e Ministrisë së FSK-së për çështjen në fjalë për çka i ka pyetur se a është marrë një vendim për ndalimin e riteve fetare për pjesëtarët e saj brenda kazermave, apo thjesht janë shkrime dhe shpifje të mediave të caktuara që për interesa të ndryshme shpikin dhe dezinformojnë opinionin publik.
Dhe përgjigja e ministrisë është tejet e qartë: Jo! Dhe vetëm me një përjashtim.
“Nuk është marrë asnjë vendim për të ndaluar praktikën e faljes së namazit të xhumasë në kazermat e FSK-së. Çështja e ngritur nga MFSK është një rast i veçuar që ka të bëjë me çështje të procedurave të brendshme, shkelje e rregulloreve nga një njësi, publikimi i fotove pa autorizim nga hapësirat e FSK-së. Kjo ka qenë një masë e përkohshme vetëm për këtë njësi”, thuhet në përgjigjen e dhënë me shkrim për tesheshi.com nga zëdhënësi i MFSK-së, Ibrahim Shala.
Më tej në përgjigjen e FSK-së dhënë për tesheshi.com thuhet:
“As kushtetuta aktuale dhe asnjë ligj në fuqi i Republikës së Kosovës nuk e obligon FSK-në të ofrojë kushte për rituale fetare e as për faljen e namazit të xhumasë brenda institucionit. Duke respektuar të drejtat dhe liritë e besimit, mbi bazën e vullnetit të mirë dhe mirë kuptimit me praktikuesit fetarë të FSK-së, ajo nuk e pengon askënd që ta predikojë religjionin e tij ashtu siç ai dëshiron por çdo herë duke mos penguar funksionalitetin dhe operacionalitetin e FSK-së, si dhe duke i respektuar kushtet e parapara në kontratën e shërbimit”.
Pra, siç mund të shihet nga përgjigjja, FSK ka ndërmarrë një masë të përkohshme ndaj pjesëtarëve të saj që kanë lejuar rrjedhjen e fotos nga hapësirat e institucionit në media pa autorizimin e saj, dhe se nuk bëhet fjalë për kurrfarë vendimi që pjesëtarëve të FSK-së u ndalohet falja e namazit të xhumasë në të gjitha kazermat.
Megjithatë vlen të theksohet se Ministria e Forcës së Sigurisë në kohën sa drejtohej nga Agim Çeku ua kishe ndaluar pjesëtarëve të saj që gjatë orarit të punës ta kryenin ritet fetare, duke thënë se është vendim i përkohshëm.
“Jemi duke u konsultuar me Bashkësinë Islame, me ekspertë, me juristë për ligjet, Kushtetutën dhe me specifikat e ushtrisë, praktikat e ushtrive të NATO-s, kështu që është një vendim i përkohshëm derisa të marrim një vendim të ri. Mendoj që brenda këtij viti do të përfundohet kjo çështje”, deklaroi atë kohë Çeku.
Pjesëtarët e FSK-së të cilëve u ndalua dy vite më parë falja brenda kazermave u ankuan se po u bëhet padrejtësi. /tesheshi.com/
