Një stasi tritoli ka shpërthyer e dëmtuar një nga këmbët e shtyllës së linjës të tensionit të lartë 400kV, Tirana2 – Podgorice, në Fushë Krujë.
OST thotë se njësitë e saj në terren janë duke ndërhyrë për të shmangur stakimin e kësaj linje, pasi pasojat do të ishin shumë të rënda në furnizimin me energji elektrike në vend. Sepse, siç raportohet, flukset e energjisë që injektohen në këtë linjë sot janë 50% e konsumit në gjithë vendin.
OST thotë se dënon këtë akt të rëndë kriminal dhe ka kryer veprimet procedurale ne organet e drejtësisë me synim gjetjen e autorëve dhe vënien e tyre para përgjegjësisë.
Por ky nuk është një fenomen i panjohur. Tritoli në shtyllat elektrike në zonën e Fushë Krujës i ka fillesat e saj që në fillim të viteve 2000, e ku thuhej se prapa këtyre akteve kishte motive politike. Ishte koha kur opozita e djathtë ndiqte praktika esktreme politike kundër qeverisë. Aktet tritolvënëse u lidhën dhe me deklarimin e Berishës se “mund ta merrte pushtetin vetëm me militantët e Mamurrasit”.
Më pas, seria e tritolvënies do rikthehej në 2014-ën, një vit pas riardhjes së PS-së në pushtet, ku veç shtyllave të tensionit, sasitë e lëndës plasëse viheshin dhe në ambiente publike, duke provokuar një stres të përgjithshëm. Kurrë nuk u kuptua, por as u zbulua, se kush qëndronte pas asaj fushate, që erdhi dhe iku pa arsye.
Ndërkohë, ky rast i fundit në Fushë Krujë, ndodh nën të njëjtën atmosferë të acarimit politik. /tesheshi.com/
