Mbrëmë në qytetin e Manastirit në Maqedoni u hap xhamia Is’hakije për besimtarët myslimanë, të cilët patën mundësinë të falin teravitë namazin e parë pas restaurimit të xhamisë nga Agjencia Turke për Zhvillim dhe Koordinim (TIKA), që zgjati dy vite e dy muaj.
Në hapjen e xhamisë së restauruar të pranishëm ishin koordinatori i zyrës së TIKA-s në Shkup, Teoman Tiryaki, drejtor i Qendrës Kulturore Turke “Yunus Emre”në Shkup, Fejzullah Bahçi, kryetar i Bashkësisë Islame të Maqedonisë, Sulejman Rexhepi, si dhe përfaqësues të Myftinive të qyteteve të Maqedonisë.
Siç bën të ditur televizioni publik turk, Kryetari i BFI-së, Sulejman Rexhepi, duke theksuar se punët për restaurimin e xhamisë i ka organizuar TIKA, shtoi se: “Me të vërtetë kjo xhami ka pasur nevojë të ripërtërihet dhe të ndërhyhet, sepse prej kohës së periudhës osmane e këndej nuk ka pasur ndonjë ndërhyrje serioze. Prandaj, xhamia filloi të rrënohet, të humbi vlerat dhe monumentet historike që i posedonte”, tha ai.
Sipas tij, duke marrë parasysh angazhimin dhe punët për realizimin e projektit, dy vite e dy muaj është një kohë shumë e shkurtër. Xhamia tërësisht është restauruar, ndërsa vetëm pjesa rreth xhamisë ende nuk është përfunduar tërësisht.
Koordinator i zyrës së TIKA-s në Shkup, Teoman Tiryaki, theksoi se zyra e TIKA-s në Shkup është hapur në vitin 2005 dhe gjatë kësaj kohe janë realizuar shumë projekte, veçanërisht në fushën e kulturës dhe ekonomisë, ndërsa më tej shtoi se kjo xhami është restauruar për dy vite e dy muaj. Tiryaki njoftoi se momentalisht është duke u realizuar edhe restaurimi i xhamisë Mustafa Kebir në Strugë, ndërsa në të ardhmen do të restaurohen edhe tre xhami tjera në Shkup.
Xhamia Is’hakije është xhamia më e madhe aktive për besimtarët muslimanë nga rajoni i Manastirit. Ajo është ndërtuar në fillim të shekullit 16-të dhe është një ndër xhamitë më të vjetra në rajon. /tesheshi.com/
