Ish-sekretari i Përgjithshëm i PD-së, Ridvan Bode, e shikon humbjen e opozitës në zgjedhje të lidhur me mungesën e një oferte programore për qytetarët nga ana kryedemokratit Lulzim Basha në fushatën elektorale.
I ftuar në emisionin “Eko-Politikë”, Bode deklaroi se PD dhe aleatët nuk arritën të formatonin një program-ofertë për qytetarët dhe për këtë arsye shkoi edhe më keq se ç’ishte në 2013-ën.
Bode theksoi se edhe pse u trumbetua nga Basha që PD-ja ka hartuar një program me ndihmën dhe konsulencën e ekspertëve të kancelares gjermane Angela Merkel, në fakt një program i tillë nuk u pa kurrë.
“Nga sa ka deklaruar, por edhe nga sa u tha në publik, ne kurrën e kurrës nuk pamë një program që të ishte i koordinuar, i balancuar dhe të mund të deklarohej në mënyrë unike nga të gjithë kandidatët për deputetë apo përfaqësues të PD-së.
Po të jetë diskutimi në planin e njerëzve që unë mendoj që janë të vëmendshëm në këtë aspekt, sigurisht që e ka penalizuar Partinë Demokratike kjo”, u shpreh Bode.
“Pas katër viteve qeverisjeje mendoja se socialistët do të ishin më të saktë dhe më të adresuar, por në fakt, po ta marrësh materialin që kanë paraqitur në Parlament ka më shumë retorikë politike se sa propozime konkrete, apo matje, apo të themi programe të mirëfillta për reformim, dhe kjo të lë një shije të hidhur.
Sepse edhe zgjedhjet dhe fushata elektorale, pasi sigurisht, ka të drejtë Partia Socialiste që thotë se ne dolëm para qytetarëve, morëm votat e tyre dhe u besuam të vetëm për të qeverisur, dhe me kaq mbyllet argumenti politik i çështjes së programit.
Por nëse do i futemi elementëve ekonomikë të qeverisjes unë mendoj se ka gjëra për të thënë. Sepse në fushatën elektorale nuk u dol me një program elektoral, ku sigurisht që ai nuk ka në brendësinë e tij përllogaritjet që janë këtu te programi qeverisës, por do të ishte një program nga pikëpamja politike.
Dhe në këtë kuptim këta dolën pa program, ashtu sikurse doli dhe opozita. Dhe opozita për llogari të saj nuk arriti dot të formatonte një program-ofertë për qytetarët dhe për këtë arsye shkoi edhe më keq se ç’ishte në 2013-ën”, tha Bode. /tesheshi.com/
