Sekretari amerikan i Shtetit gjenden në Moskë për bisedime me homologun e tij rus; një takim që vjen mes tensionit të shpërfaqur për konfliktin sirian.
“Ndërsa vendimi i sekretarit amerikan të Shtetit për të lënë një takim të NATO-s dhe për të vizituar Moskën ngjante fillimisht të vinte në pah dëshirën e Shtëpisë së Bardhë për marrëdhënie më të mira me Rusinë, pritshmëritë ndryshuan pasi Donald Trump nisi sulmin me raketa javën e shkuar mbi një bazë ajrore siriane, një lëvizje e dënuar nga Kremlini,” shkruan The Guardian në lidhje me takimin e sotëm.
Britanikja vijon kështu, “Ndërsa Tillerson filloi takimin të mërkurën, çështja nuk ishte nëse do të arrinte një marrëveshje mbi Sirinë, por nëse mund të fillonte ndonjë lloj dialogu!”
Krisja bëhet më e qartë kur mësohet se ende nuk dihet nëse Tillerson do të takohet me presidentin Putin.
Sipas Ministrisë së Jashtme ruse, bisedimet shpresohet të stabilizojnë dhe të normalizojnë marrëdhëniet midis dy vendeve.
“Do të donim të kuptonim nëse Uashingtoni synon të rinisë bashkëpunimin praktik me Rusinë në luftën kundër terrorizmit,” thotë deklarata e këtij dikasteri, duke iu referuar raportimit të Russia Today.
I njëjti burim informativ bën me dije se Lavrov i ka deklaruar Tillerson-it se është e rëndësishme që të shmanget më tej çdo sulm tjetër amerikan mbi Sirinë. /tesheshi.com/
