Nga Blendi Gashi
Ky muaj pritet të jetë përcaktues për t’i dhënë një drejtim krizës politike kosovare, pasi pushteti dhe opozita kanë ndërmarrë dy nisma të kundërta, të cilat synojnë t’i realizojnë.
Në tavolinë do jenë mocioni opozitar për rrëzimin e qeverisë “Mustafa” dhe në anën tjetër marrëveshja për Demarkacionin me Malin e Zi, që do ridërgohet Kuvend për ratifikim, këtë gjë e ka konfirmuar vet kryeministri.
Qeveria i synon votat e 80 deputetëve për ratifikimin e marrëveshjes në fjalë, kurse opozita ka nisur tashmë të mbledh 40 votat që i duhen për ngritnjen e mocionit.
As e para as e dyta nuk i kanë votat e mjaftueshme për nismat e tyre, pasi u duhen votat e njëra-tjetrës, por përkundër kësaj thonë se do rezultojnë të suksesshme.
Por shtrohet pyetja se cila prej tyre do triumfojë, pra mocioni i opozitës apo Demarkacioni që pushteti me ngulm dëshiron ta jetësojë?
Demarkacioni…
Koalicioni qeverisës asnjëherë me zë të plotë dhe siguri nuk thotë se do e kalojë Demarkacionin, por vetëm se do e dërgojë në Kuvend, pasi që është i vetëdijshëm për mungesën e votave brenda kampit të vet.
Ndërsa opozita, sidomos Vetëvendosje ja ka bërë të qartë ekzekutivit se do mundohet në çdo formë që të ndalë ratifikimin e kësaj marrëveshjeje pasi e quan të dëmshme për vendin.
Ky muaj padyshim se do jetë përcaktues për Demarkacionin ku pritet përfundimisht të mësohet përgjigja nëse do fitojë pozita apo opozita.
Mocioni opozitar…
Në anën tjetër, opozita siç duket për të tërhequr vëmendjen nga Demarkacioni, tashmë ka marrë një iniciativë për rrëzimin e qeverisë.
Dhe kjo nismë është marrë nga Fatmir Limaj i NISMA-s dhe kryetarja e grupit parlamentar të këtij subjekti, Valdete Bajrami, ka konfirmuar se këtë javë ka nisur të mbledh 40 nënshkrimet e nevojshme për çka i duhet t’i lus edhe ata të pushtetit.
Kjo nismë e Limajt përkrahet edhe nga Vetëvendosje e AAK pasi janë “pro” rrëzimit të pushtetit, shihet me skepticizëm nga vet opozitarët pasi janë mëse të vetëdijshëm se edhe nëse mbledhin 40 nënshkrimet për ta dërguar në seancë, e kanë tejet të vështirë për të mos thënë të pamundur për të bërë 61 vota sa duhen për rrëzimin e koalicionit qeverisës.
Edhe pse dy-tre deputetë të mazhorancës kanë konfirmuar votën e tyre për mocionin e opozitës, kjo është pamajaftueshme andaj Limajt dhe partisë së tij i mbetet t’ua ndryshojë mendjen ish-bashkëpartiakëve për ta rrëzuar Mustafën.
Analistë politikë, të pyetur për dy çështjet në fjalë janë shprehur skeptik duke thënë se Demarkacioni nuk mund të kaloj pa votat e deputetëve të koalicionit që janë shprehur kundër, megjithatë nuk e kanë përjashtuar mundësinë që të ratifikohet pas pazareve që mund të bëhen në sekondat e fundit.
Kurse për mocionin e opozitës për rrëzimin e qeverisë, analistët kanë deklaruar për tesheshi. com se kjo është e pamundur të ndodh pasi i duhet një përkrahje e madhe nga vet deputetët e mazhorancës.
Pra, siç mund të shihet të dy taborret edhe pushteti edhe opozita këtë muaj janë në offensive të plotë për bërjen e votave për të çuar përpara nismat e tyre. Dhe ky muaj pritet të përcaktojë se cila prej tyre do triumfojë.
Kujtojmë se mundësia e zgjedhjeve të reja është përmendur posaçërisht pas Konventës së VIII të Partisë Demokratike të Kosovës, kur u shpreh gatishmëria për t’u futur në garën zgjedhore.
Përmes deklarimeve për mospërmbushje të obligimeve karshi, siç thonë, qytetarëve të vendit, partitë në koalicionin qeverisës kanë shtuar kritikat ndaj njëra-tjetrës “për ngecje të proceseve të mëdha”. /tesheshi.com/
