Nga Bekim Laçi
Katrahura nëpër të cilën po kalojnë emigrantët sirianë dhe afganë në Maqedoni, respektivisht trajtimi johuman që po u bëhet atyre nga autoritetet shtetërore, për të cilën tesheshi.com ka informuar, nuk ka lënë indiferentë qytetarët të cilët për çdo ditë e më shumë, po mobilizohen dhe aktivizohen kundër skenave rënqethëse.
Emigrantëve, të cilët hyjnë në Maqedoni nga Greqia, nuk u lejohet të përdorin trenin si mjet transporti në rrugëtimin e tyre drejt Sërbisë, dhe kështu bëhën pre e mashtruesve të cilët u shesin biçikleta me çmime maramendëse.
Ata që kanë para me vete i blejnë ndërsa ata që nuk kanë mbeten në mëshirën e fatit, të lodhur e raskapitur nga rrugëtimi mijëra kilometërsh, prandaj ndihmën e qytetarëve të rëndomtë e shohin si ndihmë të drejtpërdrejtë të Zotit.
Besnik Hamiti, është mjek i përgjithshëm, punon në një kompani të huaj për hulumtime klinike mjekësore, si koordinator i studimeve dhe është aktiv me kontributin e tij në sektorin civil.
Një ditë më parë, së bashku me bashkëshorten e tij ngarkoi veturën me medikamente si dhe sasi ushqimore dhe u nis rrugës ku zakonisht kalojnë emigrantët. Portalit tesheshi.com, ja përshkroi këtë rrugëtim të gjatë 110 km, me destinacion të fundit Demir Kapinë, qytet afër kufirit: “Rrugës ndaleshim duke u ofruar ujë dhe medikamente turmave që ecnin në këmbë, në ato temperatura të larta. Ne, në veturë e kishim të vështirë të udhëtonim.
Paramendoni emigrantët!”, thotë ai për të shtuar se aksionin vullnetar e ka ndërmarrë, sepse siç thotë profesioni i mjekut, krahas zanatit, është mision, por ndonjëherë jo vetëm kaq, profesioni i mjekut mund të jetë edhe vetë jeta: “Pikërisht misioni dhe natyra humane e këtij profesioni na shtyu që të nisemi për në Demir Kapi, për të takuar emigrantët sirianë, afganë dhe të tjerë. E thamë me vete, në mos më shumë, bile t’ju dhurojmë pak shpresë, apo siç dikur thoshte Bajroni, “buzëqeshju të tjerëve, pasi është mjekësi që nuk kushton shtrenjtë”.
Emigrantët, siç thotë Besniku, në të shumtën e rasteve ankohen në dhimbje të muskujve, mbase gati të gjithë emigrantët kanë kallo në shputat e tyre, gjë që ju vështirëson, pamundëson dhe ju shkakton dhimbje të mëdha personave që duhet të kalojnë qindra kilometra në këmbë. Në turmat e mëdha ka gra dhe fëmijë, si një grup i veçantë, me nevoja të veçanta dhe sensitive.
Mes tyre shpesh ndodh të ketë gra shtatzëna: ”Deri më tani, jemi munduar që me organizim vetiak të sigurojmë medikamentet që zakonisht jepen për ndihma të nevojshme të patjetërsueshme, mirëpo fluksi i emigrantëve është i madh, andaj nevojitet përkrahje nga organizata tjera nacionale dhe internacionale”, rrëfen Besniku duke alarmuar për raste me diagnozë më të rëndë:”Emigrantët ngurrojnë të paraqesin rastet e tilla, meqë ato drejtohen për në spitale sekondare apo terciare. Mjekët në ato spitale e bëjnë intervenimin, mirëpo shërbimin nuk kanë kujt t’ia paguajnë prandaj edhe i paraqesin në polici. Pas shërimit të tyre, i dërgojnë në Qendrën për Pritje të emigrantëve”.
Besnik Hamiti apelon që të bëhet ndryshimi i ligjit për azil, për t’ju mundësuar emigrantëve tranzit të sigurtë nëpër territorin e Republikës së Maqedonisë, si dhe shfrytëzim të lirë e të plotë të mjeteve transportuese të shtetit, duke mos e cenuar pasurinë e tyre: “Janë sulmuar, grabitur… tmerr i vërtetë” përfundon tregimin e tij për përvojën që ka përjetuar me emigrantët.
/tesheshi.com/
