Kryeministri Edi Rama ka ftuar sërisht opozitën për përcaktimin e një kornize mbi të cilën do të zhvillohet dialogu mes shumicës dhe pakicës.
Në mbledhjen e grupit parlamentar socialist, Rama i ka kthyer përgjigje deklaratave të PD dhe kreut të saj Lulzim Basha për reformën zgjedhore
“PS nuk është një klient që ulet në tryezë për të pranuar menunë që i vihet përpara, që do të thotë se ne jemi palë e rëndësishmë, pa të cilën natyrisht s’mund të ketë asnjë tryezë dhe si e tillë PS ka vullnetin e mirë të çelë një diskutim për përmirësimin e proçesit zgjedhor, por në kuadër të një konceptimi tërësor të marrëdhënies qeveri-opozitë, PS-PD, që do të thotë që s’është vetëm procesi zgjedhor por ka edhe të tjera çështje me rëndësi publike që meritojnë të adresohen.
Nëse flasim për një bashkëpunim mes qeverisë dhe opozitës nuk flasim për një tryezë ku ne bashkohemi për të gjitha gjërat që ne na ndajnë si kampe, por për një tryeze ku ulemi për interesa të rëndësishme të njerëzve dhe vendit.
E mirëpresim PD në një dialog të vërtetë dhe realist lidhur me proçesin zgjedhor, por dëshirojmë paraprakisht të përcaktojmë një kornizë të qartë brenda të cilës do zhvillohet dialogu i shumicës parlamentare me opozitën, kjo nuk përjashton opozitën tjetër, por boshti i dialogut është PD-PS.
Në zgjatimin e këtij boshti është e mirëpritur edhe opozita tjetër parlamentare të japë kontributin e vet. Baza e konsensusit është PS-PD”, tha Rama. /tesheshi.com/
